Ձևավորված դատական բուրգի ստորադաս դատարաններն իրենց որոշումներում կախված են վերադաս դատարաններից. Գագիկ Ջհանգիրյան (տեսանյութ)
Աջակցիր «Ա1+»-ինԱզգային ժողովում ընթացող Բարձրագույն դատական խորհրդի անդամների ընտրության հարցով նիստում ԲԴԽ անդամի պաշտոնում առաջադրված Գագիկ Ջհանգիրյանն իր ելույթի ընթացքում անդրադարձավ Բարձրագույն դատական խորհրդի մի շարք խնդիրներին, մասնավորապես խոսեց դատարանների և դատավորների անկախության մասին։
Նրա խոսքով՝ սահմանադրության 173-րդ հոդվածի համաձայն՝ ԲԴԽ հիմնական առաքելությունը դատարանների և դատավորների անկախության երաշխավորումն է։ Այստեղից հետևում է, որ այդ անկախության երաշխավորող մարմինն ինքը նախ և առաջ պետք է լինի անկախ և գործի անկախ․
«Պետք է արձանագրենք, որ սահմանադրական մակարդակում հռչակվում է ԲԴԽ անկախ պետական մարմին լինելու հանգամանքը։ Բացի այդ, ԲԴԽ անդամները, ընտրվելով թե՛ դատավորների ընդհանուր ժողովի և թե՛ Ազգային ժողովի կողմից, հաշվետու չեն իրենց ընտրող մարմիններին, դրանով իսկ անկախ են և գործում են անկախ։ Հավելենք, որ ԲԴԽ բոլոր անդամները ՀՀ Վճռաբեկ դատարանի դատավորի աշխատավարձին համապատասխան վարձատրություն են ստանում, ինչը բավականին բարձր է», - ասաց Ջհանգիրյանը։
Ելույթի երկրորդ մասում նա անդրադարձավ տարածված այն միտմանը, որ եթե դատարաններն ու դատավորները անկախ են գործադիր և օրենսդիր իշխանություններից, ուրեմն նրանք անկախ են։ Իրականում այդ կախվածության կամ անկախության գործոնները շատ ավելի շատ են․
«Դատավորները պետք է անկախ լինեն ֆինանսական խոշոր կարողություններ ունեցող սուբյեկտներից, քրեական կամ գողական համակարգերից, ընդդիմադիր և իշխանական ուժերից, այլ կլաններից։ Բացի այդ, կա անկախության ևս մեկ շատ կարևոր ներքին խնդիր՝ ստորադաս դատարանների անկախությունը վերադաս դատարաններից», - ասաց նա։
Շատ կարևոր հանգամանք է նաև գործող դատական համակարգի զտման խնդիրը, նշեց Ջհանգիրյանը․ « Ցավոք սրտի, նոր իշխանության եկած քաղաքական ուժն անցած տարիների և ամիսների ընթացքում այդ ուղղությամբ գործնական քայլեր չի կատարել և դատական ուժը մնացել է հնի ժառանգորդ ու այդպես իներցիայով շարժվում է առաջ»։
Մանրամասները՝ տեսանյութում