Բացել լրահոսը Փակել լրահոսը
Agua-potable
A A
Պաշտոնական

Կաթնառատ բնակավայրի ջրամատակարարումը շարունակում է անջատված մնալ

ՀՀ առողջապահական եւ աշխատանքի տեսչական մարմնի հյուսիսային տարածքային կենտրոնում աշխատանքային հանդիպման ժամանակ քննարկվել են Լոռու մարզի Տաշիր համայնքի Կաթնառատ բնակավայրին մատակարարվող ջրի որակին առնչվող հարցեր։ Հիշեցնենք, որ օրեր առաջ ջրի որակական որոշ շեղումների պատճառով աղիքային վարակի դեպքեր էին արձանագրվել։
 
Աշխատանքային հանդիպմանը մասնակցել են ԱԱՏՄ հյուսիսային կենտրոնի ղեկավար Արման Ոսկանյանը, Տաշիրի համայնքապետարանի հողօգտագործման, քաղաքաշինության, գյուղատնտեսության և ճարտարապետության բաժնի պետ, գլխավոր ճարտարապետ Սլավիկ Անախասյանը և «Վանաձորի կանխարգելիչ ախտահանման կենտրոն» ՓԲԸ-ի տնօրեն Զորիկ Չիլինգարյանը։
 
ՀՀ առողջապահական եւ աշխատանքի տեսչական մարմնից հայտնում են, որ հանգամանորեն անդրադարձ է կատարվել Կաթնառատի խմելու ջրի ջրամատակարարման համակարգում հայտնաբերված խախտումների վերացման, բնակչությանն անվտանգ ջրով ապահովելու գործընթացը հնարավորինս արագ ավարտին հասցնելու, օրվա կարգավորիչ ջրավազանի (ՕԿՋ) քլորացման հարցերին։
Կաթնառատ բնակավայրի ջրամատակարարումը շարունակում է ՀՀ ԱԱՏՄ ղեկավարի կարգադրագրի համաձայն մնալ անջատված, քանի դեռ ջրի որակին ներկայացվող պահանջների խախտումներն ամբողջապես չեն վերացվել։