Արցախի նախագահ Արայիկ Հարությունյանը ցավակցական գրառում է կատարել
Աջակցիր «Ա1+»-ինՄահացել է Ազգային ժողովի նախկին պատգամավոր, «Սև հովազ» ջոկատի հրամանատար Ռուստամ Գասպարյանը։ Այս մասին քիչ առաջ հայտնեց ԱԺ պատգամավոր Նաիրա Զոհրաբյանը. «Կյանքի հետ անհամատեղելի էին բեկորային վնասվածքները»։
Օրեր առաջ Ռ. Գասպարյանի 26-ամյա որդին՝ Ռաֆայել Գասպարյանը զոհվել էր, իսկ ինքը՝ ծանր վիրավորում էր ստացել արցախա-ադրբեջանական սահմանին ընթացող մարտերի ժամանակ: Հոկտեմբերի 16-ին Ռ. Գասպարյանին վիրահատել էին Ստեփանակերտում, այնուհետև տեղափոխել Գորիսի ԲԿ, ապա՝ «Էրեբունի ԲԿ»։
Ռուստամ Գասպարյանը երկու գումարման խորհրդարանների պատգամավոր էր, Արցախյան առաջին պատերազմի մասնակից, Հայաստանի և Արցախի Արիության մեդալի շքանշանակիր:
Արցախի նախագահ Արայիկ Հարությունյանը ցավակցական գրառում է կատարել.
«Սիրելի ՛ հայրենակիցներ
Մեր ժողովրդի արժանի զավակներ Ռուստամ Գասպարյանի և նրա որդու կորուստն այս օրերի մեր ողբերգական դեպքերից եղավ: Ռուստամը մեր օրերի Աբրահամներից է, ով իր հարենապաշտությամբ զոհասեղանին դրեց ոչ միայն իր, այլև զավակի մատաղ կյանքը…
Վշտակցում եմ բոլոր հարազատներին:
Երբեք չեմ մոռանա Ռուստամի հետ մեր վերջին հանդիպումը Հադրութ քաղաքի մատույցներում, որտեղ նա մեզ հետ մասնակցեց պատասխանատու առաջադրանքի քննարկման գործին:
Անպարտելի է այն ժողովուրդը, որը Ռուստամներ է ծնում»։
