ԱԺ-ն մերժեց Արայիկի Հարությունյանի պաշտոնանկման հարցը վարչապետին ուղարկելու ԼՀԿ-ի նախագիծը (տեսանյութ)
Աջակցիր «Ա1+»-ին«35 կողմ», «84 դեմ» «0 ձեռնպահ» ձայների հարաբերակցությամբ Խորհրդարանի իշխող մեծամասնությունն այսօր հրաժարվեց հաստատել ընդդիմադիր «Լուսավոր Հայաստան» խմբակցության ներկայացրած՝ Կառավարությանն ուղղված հարցապնդումը, որը վերաբերում էր ԿԳՄՍ նախարար Արայիկ Հարությունյանի գործունեությանը անվստահություն հայտնելուն:
Մինչ քվեարկությունը՝ ԼՀԿ ղեկավար Էդմոն Մարուքյանը հետաքրքրվեց՝ նախարարը չի՞ հրավիրվել ներկա լինելու այսօրվա քվերակությանը: Ի պատասխան՝ ԱԺ նախագահ Արարատ Միրզոյանը արձագանքեց, թե նախարարը կապ է հաստատել իր հետ, ինքն ասել է՝ գալու կարիք չկա հարցի ցանկացած լուծման դեպքում:
«Ցանկացած դեպքում այս սեպտեմբերյան օրերին նախարարին գործից կտրելը համարել եմ ոչ նպատակահարմար»:
Վարման կարգով ելույթ ունենալով՝ ԲՀԿ խմբակցութան պատգամավոր Իվետա Տոնոյանը հայտարարեց՝ ԲՀԿ-ն անհարիր է համարում Արայիկ Հարությունյանի՝ նախօրեին ԱԺ ամբիոնից հնչեցրած ելույթի ավարտական հատվածը, ինչպես նաև դրան հաջորդած գնահատականները.
«Մենք դրանք որակում ենք ոչ կոռեկտ և բարոյական սահմանները անցնող»:
Տոնոյանը շեշտեց՝ Արայիկ Հարությունյանի հետագա պաշտոնավարման նպատակահարմարությունը չեն տեսնում և միանում են ԼՀԿ գործըներների հարցապնդմանը:
«Իմ քայլը» խմբակցության ղեկավար Լիլիթ Մակունցը, իր հերթին արձագանքելով Իվետա Տոնոյանի դիտարկումներին, ասաց.
«Ամիսներ շարունակ հետևողական սուտ և կեղծ տեղեկատվություն տարածողները բարեկրթության մասին գնահատականներ տալիս պետք է առաջին հերթին գնահատական տան իրենց խմբակցության շատ կոնկրետ պատգամավորի՝ Գևորգ Պետրոսյանին, ով ընդհանրապես որևէ բարեկրթության նորմ և սահման չի պահպանում՝ տարածելով սուտ և կեղծ տեղեկատվություն»:
