Կառավարությունը զբոսաշրջության ոլորտին աջակցություն կտրամադրի (տեսանյութ)
Աջակցիր «Ա1+»-ինԿառավարության այսօրվա նիստում հաստատվեց կորոնավիրուսի տնտեսական հետևանքների չեզոքացման 23-րդ միջոցառումը։
Էկոնոմիկայի նախարար Տիգրան Խաչատյանի ներկայացմամբ՝ ծրագիրը վերաբերում է զբոսաշրջության ոլորտին։
«Կորոնավիրուսի համավարակի տարածումը հատկապես մեծ ազդեցություն է զբոսաշրջության ոլորտին առնչվող ծառայությունների բնագավառում: Այդ ոլորտներում տարբեր ծառայությունների գծով ազդեցությունը տարբեր է եղել, բայց ընդհանուր առմամբ, ըստ վերջին ամիսների տվյալների, նշված ոլորտներում ծառայությունների մատուցումից եկամուտները նախորդ տարվա նույն ամիսների համեմատությամբ կրճատված են ավելի քան երկու անգամ: Նշված պատճառներով առաջացած ֆինանսական դժվարությունների արդյունքում կազմակերպությունները կանգնել են բիզնեսի շարունակականության ապահովման համար անհրաժեշտ ակտիվները պահպանելու զգալի դժվարությունների առջև»:
Խաչատրյանի խոսքով՝ ոլորտի ներկայացուցիչների հետ իրենց քննարկումները պարզել են՝ այդ կազմակերպությունների համար ամենակարևոր խնդիրներից մեկն աշխատատեղերի պահպանման հետ կապված ֆինանսական դժվարությունները հաղթահարելու հարցն է․
«Աջակցության շահառուների շրջանակը հետևյալն է՝ կացության կազմակերպում, ներառում է նաև առողջարանները, հանրային սննդի կազմակերպում, զբոսաշրջային գործակալություններ և օպերատորներ և զբոսաշրջային այլ ծառայություններ: Նախատեսվում է, որ աջակցությունից կօգտվեն այն կազմակերպությունները, որոնք ունեն առնվազն երեք աշխատակից և ստեղծվել են ոչ ուշ, քան 2020 թվականի մարտի 31-ը»,-տեղեկարեց էկոնոմիկայի նախարար Տիգրան Խաչատրյանը:
Այս միջոցառման շրջանակներում կառավարությունը կսուբսիդավորի կազմակերպությունների յուրաքանչյուր երրորդ կամ չորրորդ աշխատողի աշխատավարձը, ինչը նշանակում է ամբողջ աշխատավարձի ֆոնդի 30 կամ 23 տոկոսը։
Առավել մեծ աջակցություն կստանան այն կազմակերպությունները, որոնք պահպանել են աշխատատեղերի 70 և ավելի տոկոսը։
Նիկոլ Փաշինյանն իր հերթին ընդգծեց, որ այս ծրագրի նպատակը հատկապես ոլորտի աշխատողներին աջակցելն է, որպեսզի նրանք չզրկվեն իրենց աշխատանքից։