Հայաստանում տեղի ունեցած փոփոխությունները նպաստել են բանակի կառավարելիության բարձրացմանը․ Անդրանիկ Քոչարյան (տեսանյութ)
Աջակցիր «Ա1+»-ինԵս կարծում եմ, որ այսօր հարաբերական անդորրը պայմանավորված է նրանով, որ հակառակորդը նկատեց, որ իր գործիքակազմի նման կիրառումը էֆեկտիվ չէ։ Այս մասին ԱԺ-ում լրագրողների հետ զրույցում նշեց ԱԺ «Իմ քայլը» խմբակցության պատգամավոր, Պաշտպանության և անվտանգության հարցերի մշտական հանձնաժողովի ղեկավար Անդրանիկ Քոչարյանը․
«Ակնհայտ է, որ Ադրբեջանը միշտ ցանկություն է ունեցել ստատուս-քվոյի փոփոխության հասնելու, այսինքն՝ շփման գծի տարբեր հատվածներում ինչ-որ փոփոխություններ ի շահ իրեն ունենալու, և Ապրիլյան պատերազմն էլ միտված էր այդ խնդրի իրականացմանը»։
Քոչարյանի դիտարկմամբ՝ 1994 թվականի զինադադարի պայմանագրով ամրացված է այսօրվա շփման գծի ամբողջ պատկերը, և միշտ նման գործողություններով Ադրբեջանը ակնկալիք ունի, որ հաջողություն կունենա․
«Ադրբեջանը գնահատում է, որ 2016 թվականին ինքը ունեցավ հաջողություն, այս անգամ իր գործողությունները այս պահի դրությամբ հաջողության չհասան, և մենք պետք է ամեն ինչ անենք, որ մեր դիրքային և կառավարելիության հաջողությունը զարգացվի»։
Քոչարյանը արձանագրեց՝ Հայաստանում տեղի ունեցած փոփոխությունները նպաստել են բանակի կառավարելիության բարձրացմանը, ինչը տեսանելի է բոլորին․
«Ով չի ուզում դա տեսնի, նա չի ուզում Հայաստանի ապագային հավատա»։
Ինչ վերաբերում է միջազգային հանրության արձագանքին, պատգամավորն ասում է՝ միջազգային հանրությունը գնում է միշտ նույն ձևաչափով՝ կոչ հանդարտության, պահպանել զինադադարի տրամաբանությունը․
«Մենք էլ կարծում ենք, որ ռազմական լուծում այս հարցում գոյություն չունի և պետք է գտնել հարթակներ, որտեղ մեր հարաբերությունները հարևան պետության հետ պետք է լուծենք քաղաքական, բանակցային գործընթացների միջոցով։ Լուծումներ պետք է գտնել Արցախի հարցում, որը կբավարարի Հայաստանի ժողովրդին, Ադրբեջանի ժողովրդին և Արցախի ժողովրդին»։
Ինչ վերաբերում է նախկին իշխանության կողմից հնչող քննադատություններին, Քոչարյանն ասում է՝ նախկին իշխանությունները չեն ուզում ակնհայտ իրողության հետ հաշվի նստել․
«Ի տարբերության իրենց պաշտոնավարման տարիների պաշտպանական ու անվտանգային համակարգի թուլությունների՝ այսօր ունենք առավելություններ, և այդ առավելություններով պետք է ոգևորվել, ուրախանալ, որովհետև դա բոլորինն է»։
Քոչարյանը հիշեցրեց, որ նախկինում լարվածության պահերին ընդդիմությունը դադարեցրել իր ընդդիմադիր գործունեությունը մինչև լարվածության ավարտը, ըստ նրա՝ այսօր պատկերը այդպիսին չէ, բայց մեր Զինուժը լուծում է իր առջև դրված խնդիրները․
«Այսօրվա զինադադարը պարտադրված է հակառակորդին, իրենք հասկացան, որ Հայաստանի հետ ուժի դիրքերից խոսել հնարավոր չէ»։
Տեսանյութը՝ Factor.am-ի