Համալիրի մահճակալներն այլեւս պետք չե՞ն կամ ո՞ւմ է թույլատրված երգել (տեսանյութ)
Աջակցիր «Ա1+»-ինՕպերային երգչուհի Վերոնիկա Ջիոեվան քիչ առաջ տեսանյութ է հրապարակել Մարզահամերգային համալիրում տեղի ունեցած համերգային փորձից։ Նա եւս մասնակցում է «Music 20» խորագրով առցանց միջազգային փառատոնին,որը տեղի կունենա հուլիսի 10-28-ը Երևանում։
Այսօր ավելի վաղ կազմակերպիչները՝ Հայաստանի պետական սիմֆոնիկ նվագախմբի գեղարվեստական ղեկավար և գլխավոր դիրիժոր Սերգեյ Սմբատյանն ու Մարզահամերգային համալիրի տնօրեն Կարեն Ղազարյանը, մանրամասներ էին հայտնել։ Տեղի կունենա 9 սիմֆոնիկ, 5 կամերային համերգ, 3 մենահամերգ և 2 անսամբլային համերգ։
Համալիրում կազմակերպվող այս իրադարձությունը զարմացրել է հանրությանը․ նրանք շատ լավ հիշում են այն մահճակալները, որոնք տեղադրված էին այնտեղ՝ կորոնավիրուսով հիվանդների համար։
ՀՀ իշխանությունը պատրաստվում է կրկին երկարաձգել արտակարգ դրությունը, քանի որ վտանգը չի վերացել, հետեւաբար ենթադրվում է՝ համալիրի մահճակալների անհրաժեշտությունը դեռեւս կարող է լինել։ (Քանի որ ժամը ուշ էր, մեզ այս պահին չհաջողվեց մեկնաբանություն ստանալ ԱՆ-ից՝ արդյո՞ք մահճակալները հավաքվել են-խմբ)
Երաժշտական հայ հանրությանը այս փաստը ոչ միայն զարմացրել, այլեւ վրդովվեցրել է , որովհետեւ իրենք արդեն քանի ամիս է զրկված են փորձեր անելու հնարավորությունից՝ պարետատան սահմանափակումների պատճառով։ Իսկ նման դադարը խիստ բացասական է ազդում կատարողականի վրա։ Առողջապահության նախարար Արսեն Թորոսյանն էլ հուլիսի 7-ին հայտարարել էր, որ ամենառիսկայիններից է երգեցողությունը, «քանի որ մեծ քանակի վիրուսային մասնիկներ են արտաշնչվում շրջակա միջավայր եւ հնարավոր է վարակեն կողքի մարդկանց»։
Իսկ «Music 20» կազմակերպիչները խոստանում են՝ միջոցառման ընթացքում խստագույնս պահպանվել հակահամաճարակային առողջապահական բոլոր սահմանված կանոնները:
Ըստ նրանց՝ COVID-19-ի հետևանքով ստեղծված իրավիճակում այս միջոցառման անցկացումը իրապես մեծ իրադարձություն կլինի մշակութային կյանքի համար, և ոչ միայն Հայաստանում։
«Աշխարհահռչակ արտիստներ կժամանեն Հայաստան‚ և Հայաստանը կլինի այն կենտրոնը‚ որին իրենց հայացքը կուղղեն դասական երաժշտության սիրահարները։ Մենք ակնկալում ենք ավելի քան 100 000 առցանց դիտումներ»‚- այսօր ասել էր Սերգեյ Սմբատյանը։ Իսկ թե ինչպես են թռիչքներ չլինելու դեպքում՝ նրանք ժամանել Հայաստան, կներկայացնենք վաղը։