Sevan Startup Summit 2020-ը չեղարկվել է
Աջակցիր «Ա1+»-ինԱրտակարգ իրավիճակի երկարաձգման և սահմանափակումների հետևանքով չեղարկվել է Sevan Startup Summit 2020-ը, որն այս տարի նախատեսված էր հուլիսի 26-ից օգոստոս 1-ը։
Sevan Startup Summit –ի տնօրեն Վահագն Ռափյանը «Ա1+»-ի հետ զրույցում հայտնեց, որ նախապատրաստական որոշ աշխատանքներ արվել էին, թեեւ մարտ ամսից արդեն պարզ էր, որ այս տարի դժվարություններ էին սպասվում։
«Նախորդ տարի մեր մասնակիցների 40%-ը արտասահմանից են եղել և ենթադրվում էր, որ այս տարի չենք կարող ընդունել տարբեր երկրներից մասնակիցներ, սակայն հույս ունեինք՝ կկարողանանք տեղի մասնակիցների հետ իրականացնել Սևանում և իսկ իրենց համար առցանց տարբերակով կփորձեինք կազմակերպել»,- ասում է Վահագն Ռափյանը։
Sevan Startup Summit-ի կարևոր առանձնահատկություններից է, որ մասնակիցները միասին կենցաղ կիսեն, իրական շփում լինի բնության մեջ,համատեղեն աշխատանքն ու ժամանցը։ Առցանց տարբերակով, ըստ նրա, պարզապես անհնար է ապահովել համաժողովի այս առանձնահատուկ պայմանը։
Վահագն Ռափյանի խոսքով՝ հնարավոր է այլ ծրագիր ներկայացնեն աշնանը, բայց քանի որ ամեն ինչ կախված է զարգացումներից, չի կարող որևէ հայտարարություն անել։
Հիշեցնենք, որ Sevan Startup Summit -ը վրանային հավաք է, որը միավորում է սկսնակ ձեռներեցների, ներդրողների և ՏՏ էկոհամակարգի այլ ներկայացուցիչների` ստեղծելով աննախադեպ ոչ ֆորմալ միջավայր` կրթության, բիզնես կապերի հաստատման և ներդրումային գործարքների համար:
