Խնդրում ենք պարոն Վարչապետին ներողամիտ լինել ու հասկանալ մեզ․ 114 դպրոցի տնօրենի լուսանկարը՝ շրջանավարտների՝ ֆեյսբուքյան էջի գլխավոր նկար (տեսանյութ)
Աջակցիր «Ա1+»-ին114 ավագ դպրոցի աշակերտները նախաձեռնել են ստորագրահավաք ի պաշտպանություն տնօրենի՝ Ռուզաննա Կոստանյանի։
Հունիսի 4-ին վարչապետ Նիկոլ Փաշինյանն իր ֆեյսբուքյան էջում հրապարակել էր տեսանյութ, թե ինչպես է նշվել Վերջին զանգը։
Միացել են 1312 հոգի։ Ի դեպ, դպրոցի շրջանավարտները փոխել են ֆեյսբուքյան իրենց լուսանկարը՝ ի պաշտպանություն տնօրենի։
Նամակում նշվում է․
Օրերս ՀՀ վարչապետ Նիկոլ Փաշինյանը տեսանյութ էր հրապարակել, որին կից գրել էր․ «Մայիսի 25-ին այսպես վերջին զանգ են նշել Երեւանի 114 դպրոցի շրջանավարտները։ Հ.Գ. Պարող կինը, պարզվում է, դպրոցի տնօրենն է»։ Գրառման վերաբերյալ ներկայացնում ենք մեր պարզաբանումն ու կոչ ենք անում միանալ ստորագրահավաքին հանուն մեր սիրելի տնօրենի։
Մայիսի 25-ին Խաչիկ Դաշտենցի անվան 114 ավագ դպրոցում նախատեսված էր ատեստատների հանձնում, որն էլ իրականացվել է՝ հաշվի առնելով անվտանգության բոլոր կանոնները։
Յուրաքանչյուր դասարանի համար նախատեսված է եղել առանձին ժամ և ամեն ինչ արվել է իրավիճակին համապատասխան։ Հասկանալով, որ Վերջին զանգը չի կայանալու՝ մենք՝ ավարտական դասարանի աշակերտներս, մտել ենք տնօրենի սենյակ և փորձել փոքրիկ անակնկալ անել։ Տեսանյութում միայն հատուկ /գուցե դիտավորությամբ/ մոնտաժված հատվածն է․ կա սկիզբ և կա շարունակություն։
Յուրաքանչյուր աշակերտ ատեստատը ստանալուն պես դուրս է եկել սենյակից։ Բոլորը դպրոց մտնելիս ջերմաչափվել են. ամեն ինչ եղել է ըստ արտակարգ դրության կանոնների։ Դպրոցը եղել է նախապես ախտահանված, աշակերտները չեն գտնվել սենյակում 7 րոպեից ավելի:
Հասկանում ենք վարչապետի զայրույթն ու ընդունում, որ նման իրավիճակում մեր այդ քայլը ճիշտ չէր։ Իրավիճակի մեղավորը մենք ենք, չստացված անակնկալը մերն էր, մեր տնօրենը ընդամենը փորձեց մեզ չտխրեցնել։
Խնդրում ենք պարոն Վարչապետին ներողամիտ լինել ու հասկանալ մեզ։ Հեշտ չէ դպրոցն ավարտել ու անցկացնել նման պայմաններում։ Նոր կյանքի փուլ ենք մտնում՝ նեղացնելով մեր սիրելի ուսուցչին՝ տիկին Կոստանյանին։ Նրան կարելի է երկար ներկայացնել․ անցած ճանապարհով, շնորհակալագրերով, մեդալներով, բայց ամենակարևորը նրա լավ մարդ լինելն է։
Մարդ, որ կարող է օգնել, ներել, լինել խիստ ու լավ ուսուցիչ։ Մեզ մնում է գնահատել, չտխրեցնել ու խնդրել մի փոքր ներողամտություն։
