Բացել լրահոսը Փակել լրահոսը
A A
Տեսանյութեր Քաղաքականություն

Սյունիքում անպատժելիության էջը անվերադարձ փակված է.պատգամավորներն անդրադարձան Սյունիքի դեպքերին (տեսանյութ)

Ազգայիին ժողովում հայտարարությունների ժամին պատգամավորները չշրջանցեցին Սյունիքում տեղի ունեցած իրադարձությունները:

«Իմ քայլը» խմբակցության պատգամավոր Վիկտոր Ենգիբարյանը համարում է, որ տեղի ունեցածը փաստում է՝ շատերը չեն հասկացել, որ թավիշը թուլության հետ խառնելը ճիշտ չէ, իշխանությունը հազար անգամ է հորդորել.

«Տեղը բերեք այս պետությունը, այս պետությունը իր գոյության ողջ ընթացքում այսուհետ չպետք է հանդուրժի բդեշխություն, առավել ևս մի մարզում, որտեղ մենք տարիներ շարունակ ունեցել ենք  քրեաօլիգարխիկ մասնակցություն»:

Իշխանական խմբակցությունից մեկ այլ  պատգամավոր՝ Տիգրան Կարապետյանը հայտարարեց՝ Սյունիքում անպատժելիության էջը անվերադարձ փակված է:

Նրա պնդմամբ՝ մամուլում տարածված տեղեկություններից այնպիսի տպավորություն է ստեղծվում,  թե պետությունն իր ողջ ռեպրեսիվ մեխանիզմով հարձակվել է մարդկանց վրա, ձերբակալություններ են, ճնշումներ են և այլն:

«Իմ գործընկեր պարոն Ենգիբարյանը շատ լավ ներկայացրեց, թե ինչ է կատարվում: Այս երկու տարիների ընթացքում, ցավոք սրտի, դեռ չենք ազատվել այն իներցիայից և բազմաթիվ անելիքներ ունենք: Սյունիքում տեղի է ունեցել հանցագործություն և տեղի են ունեցել ձերբակալություններ»:

Կարապետյանը պնդեց՝  նշանակություն չունի, թե տվյալ անձը ինչ կարողության է տիրապետում, ինչ՝ գլխի չափ ունի, ով է կանգնած իր հետևում` բոլորը ենթարկվելու են պատասխանատվության՝ օրենքի ողջ խստությամբ:

Բռնությունների մասով ասաց, որ նշանակված է ծառայողական քննություն: Հորդորեց սյունեցիներին չտրվել ինչ-որ խմբավորումների սադրանքներին և առաջնորդվել սեփական կարծիքն արտահայտելու ազատ իրավունքով:

Դեպքին անդրադարձավ նաև ԼՀԿ խմբակցության պատգամավոր Անի Սամսոնյանը: Նրա խոսքով՝ ՀՀ-ն երկար ճանապարհ է անցել մինչև որ բացառել է իրավապահ համակարգում բռնությունը, ծեծը և խոշտանգումը:

«Այն, ինչ կատարվում է վերջին զարգացումներում, մենք մտավախություններ ունենք, որ կվերադառնանք նորից հին տաշտակին»:

Պատգամավորը կարևորեց ոստիկանական համակարգում բարեփոխումների, ինչպես նաև համերաշխության անհրաժեշտությունը:

«Եթե օրինակ՝ իշխանական պատգամավորները կարող են ընդդիմադիր պատգամավորին նիստերի դահլիճում հարվածել կողքից, հետևից, ապա ինչո՞ւ չէ՝ ոստիկանությունում էլ կարող են բերման ենթարկված քաղաքացուն հարվածել»:

Սամսոնյանը ոստիկանությանը հորդորեց չտրվել երկրում, իր խոսքով, լեգիտիմացված բռնության երևույթին: