Հարձակում նախկին պատգամավորին պատկանող ջերմոցի վրա․ նրա որդին, եղբայրն ու եղբորորդին վնասվածքներ են ստացել
Աջակցիր «Ա1+»-ինԵրեկ երեկոյան զինված ավազակային հարձակում է տեղի ունեցել «Ազատ Դեմոկրատներ» կուսակցության նախագահ, Ազգային ժողովի նախկին պատգամավոր Խաչատուր Քոքոբելյանի ընտանիքին պատկանող, Աչաջուր գյուղում գտնվող ջերմոցային տնտեսության պահակակետի վրա: Տեղեկատվությունը «Ա1+»-ի հետ զրույցում հաստատեց «Ազատ դեմոկրատներ» կուսակցության փոխնախագահ Անժելա Խաչատրյանը:
Նրա խոսքով՝ հարձակում են գործել անվտանգության աշխատակցի վրա, վերջինս հասցրել է ահազանգել Քոքոբելյաններին, նաև ահազանգել է ոստիկանություն:
«Քոքոբելյանները հասել են դեպքի վայր այն ժամանակ, երբ հարձակում գործողները փորձել են պահակակետի պատուհանից դուրս քաշելով` հանել անվտանգության աշխատակցին: Տեսնելով, որ Քոքոբելյանները հասել են, հարձակում գործողները իջել են մեքենայից և հարձակվել արդեն նրանց վրա ևս»:
Խաչատուր Քոքոբելյանը դեպքի վայում չի եղել, այնտեղ եղել են նրա որդին, եղբայրը, եղբորոդին, ովքեր տարբեր մարմնական վնասվածքներ են ստացել,-տեղեկացրեց Խաչատրյանը:
Հարձակում գործած անձինք այնուհետև դեպքի վայրից դիմել են փախուստի:
«Ոստիկանները զբաղվում են դեպքի քննությամբ, մեղավորների շրջանակը պարզում են, և հուսով ենք՝ շուտ կգտնեն և կձերբակալեն: Մեր ունեցած տեղեկությունով` այս պահին մեկ հոգի ձերբակալված կա»,-փոխանցեց նա:
Դրդապատճառների և այլնի վերաբերյալ մանրամասներ կամ ենթադրություններ չկան, -ասում է կուսակցության փոխնախագահը՝ հավելելով, որ ջերմոցը նորմալ աշխատել է, և որևէ խնդիր որոևէ մեկի հետ չի եղել: