Մեկի համար սանրվածքն է կարեւոր, մյուսի համար՝ տեսողությունը․ ուսանողներն առաջարկում են բացել գրադարանները
Աջակցիր «Ա1+»-ինԱրտակարգ դրության օրերին աշակերտներն ու ուսանողները օրվա մեծ մասը անցկացնում են համակարգիչների կամ հեռախոսների էկրանների առաջ: Այս օրերին ուսանողները միջինում 7-8 ժամ էկրանի առաջ են, քանի որ գրականությունը էլեկտրոնային է։ Ուսանողները կարծում են՝ գրադարանները պետք է բացվեն։
«Ստիպված հանձնարարված գրքերը օնլայն ենք կարդում, քանի որ այլ տարբերակ չկա և գրադարանների բացվելը անհրաժեշտություն է, իսկ վախենալու պատճառ չկա, քանի որ գրադարաններից շատ մարդ չի օգտվում, և մեկը ես գիրքս վերցնում եմ և գնում եմ տանը կարդալու»,- նշում է ԵՊՀ Ժուռնալիստիկայի ֆակուլտետի 3-րդ կուրսի ուսանողուհի Մոնիկա Գրիգորյանը:
Ուսանողուհին նշում է, որ եթե բացվում են գեղեցկության սրահները, ապա ինչու՞ պետք է գրադարանները չբացվեն:
ԵՊՀ Հայ բանասիրության 3-րդ կուրսի ուսանողուհի Մերի Սարգսյանը կարծում է, որ ընթերցասրահների բացվելու դեպքում միայն խնդիրներ կառաջանան:
«Օրական 8 ժամ անցկացնում եմ համակարգչի առաջ, և եթե գոնե գրադարանները բացվեն, միայն դասերի համար կօգտվեմ, իսկ գրականությունը գրքով կկարդամ: Կարծում եմ՝ խնդիրներ կառաջանան, եթե բացվեն ընթերցասրահները, բայց եթե բացվեն միայն այն բաժինները, որտեղից ընթերցողները գրքեր են վերցնում, չեմ կարծում՝ ինչ- որ խնդիր առաջանա»,- նշում է Մերի Սարգսյանը:
ԵՊՀ Ժուռնալիստիկայի ֆակուլտետի ուսանողուհի Ռիմա Գրիգորյանը եւս կարծում է, որ գրադարանները բացելը ոչ մի վտանգ իրենից չի ներկայացնում:
«Մեկի համար իր համակարգչի նորոգումն է կարևոր, որը հիմա սահմանափակված չի, մեկի համար էլ` տեսողությունը: Եթե մեկը կարող է իր շինարարությունը շարունակել, ապա ինչու՞ ուրիշները չեն կարող արագ գնալ ու գիրք վերցնել առանց այն էլ քիչ մարդաշատ գրադարաններից»,- նշում է Ռիմա Գրիգորյանը:
Ուսանողները կարծում են, որ շարունակաբար այդքան գրքեր կարդալը լուրջ տեսողական խնդիրների կհանգեցնի և գրադարանների բացվելը այս պահի դրությամբ խիստ անհրաժեշտություն է:
