Հաստատվեց կորոնավիրուսի տնտեսական հետևանքների չեզոքացման 15-րդ ծրագիրը․ այն ենթադրում է նոր աշխատատեղեր (տեսանյութ)
Աջակցիր «Ա1+»-ինԿառավարության այսօրվա նիստում ընդունվեց կորոնավիրուսի տնտեսական հետևանքների չեզոքացման 15-րդ ծրագիրը:
Շրջակա միջավայրի նախարար Էրիկ Գրիգորյանը, ներկայացնելով համապատասխան նախագիծը, մասնավորապես նշեց, որ կորոնավիրուսի տնտեսական հետևանքների չեզոքացման տասնհինգերորդ միջոցառման նպատակն է մեղմել կորոնավիրուսի տարածման հետևանքով ստեղծված սոցիալական խնդիրները՝ քաղաքացիներին հնարավորություն տալով մասնակցել ծառատունկի աշխատանքներին:
Միջոցառման շահառու են հանդիսանում Հայաստանի Հանրապետության այն քաղաքացիները կամ քաղաքացիություն չունեցող անձինք, ովքեր կմասնակցեն ծառատնկման աշխատանքներին, մասնավորապես՝ բարձրադիր գոտիներում ուռենու տեղական տեսակների կտրոնների միջոցով գետերի հովիտներում ափապաշտպան անտառաշերտերի հիմնման աշխատանքներին:
Նախարարի պնդմամբ՝ սրա արդյունքում կստեղծվեն լրացուցիչ աշխատատեղեր։ Ծրագրին ներգրավված են երեք կազմակերպություններ՝ Շրջակա միջավայրի նախարարության Անտառային կոմիտեի «Հայանտառ» ՊՈԱԿ-ը, «Վայրի բնության և մշակութային արժեքների պահպանման հիմնադրամը» և «Էյ Թի Փի» բարեգործական հիմնադրամը:
Բնակչությունը կներգրավվի նաև ցանկապատման աշխատանքներին:
Նախագծով առաջարկվում է ծառատնկման աշխատանքներին մասնակցած բնակիչներին տրամադրել 50-ական դրամ՝ յուրաքանչյուր կտրոնի պատրաստման և տնկման համար։
Գրիգորյանը վստահեցրեց, որ ծրագիրը կիրառվում է ամբողջ աշխարում և մեծ նշանակություն ունի հենց բնապահպանական տեսանկյունից:
Աշխատանքի և սոցիալական հարցերի նախարար Զարուհի Բաթոյանն էլ ասաց, որ աշխատանքին առանց մտավախությւոնների կարող են ներգրավվել նաև նպաստառու ընտանիքները:
