ԲԴԽ անդամ Հայկ Հովհաննիսյանը միտում է տեսնում (տեսանյութ)

 ԲԴԽ անդամ Հայկ Հովհաննիսյանի կարգապահական պատասխանատվության ենթարկելու վերաբերյալ դատական նիստը հետաձգվեց :

Նախքան նիստը ԲԴԽ նախագահ Ռուբեն Վարդազարյանը նշեց, որ կես ժամ հետո՝  ժամը 14:30-ին․ քննվելու է Երևան քաղաքի առաջին ատյանի դատարանի դատավոր Նաիրա Հովսեփյանի նկատմամբ կարգապահական վարույթ իրականացնելու միջնորդության քննությունը և սա  կարող է խնդիր առաջացնել:

ԲԴԽ անդամ Հայկ Հովաննիսյանը դիմեց նախագահին, ասելով, որ դատավոր Նաիրա Հովսեփյանի նշանակված գործը կարող են քննել այս գործի քննությունից հետո կամ նշանակել այլ օր:

Ռուբեն Վարդազարյանը դիմեց նրան՝ փաստորեն դուք հաջորդ նիստը ստորադասո՞ւմ եք այս նիստից, քանի որ իրավունքի խախտման խնդիր կարող է լինել: Հայկ Հովհաննիսյանն էլ իր հերթին մեկնաբանեց, որ չի ստորադասում հաջորդ նիստը, այլ առաջարկվում է շարժվել խորհրդի նշանակված ժամակացույցով:

Այնուհետև խորհուրդը հեռացավ խորհրդակցական սենյակ:

Վերադառնալով խորհրդակցական սենյակից՝ որոշվեց նիստի քննությունը սկսել, սակայն այս անգամ միջնորդություն ներկայացրեց   ապրիլի 3-ից Բարձրագույն դատական խորհրդի անդամի ժամանակավոր պաշտոնակատար նշանակված Արմեն Հայկյանցը: Նա նշեց, որ իր աշխատանքային  պարտականությունները  ստանձնել է երդման արարողությունից հետո՝ ապրիլի 21-ին, բավարար ժամանակ չի ունեցել ծանոթանալու գործի նյութերին:

ԲԴԽ անդամ Հայկ Հովհաննիսյանը առարկեց․

«Ես դեմ եմ միջնորդությունը բավարարելուն, քանի որ սա ոչ իհարկե պարոն Հայկյանցի կողմից, բայց արհեստական փորձ է այս վարույթը հետաձգելու, քանի որ ի սկզբանե ակնհայտ էր ձեր դիրքորոշումը, պարոն նախագահող, այս վարույթ հետաձգել իմ համար անհասկանալի պատճառներով»:

Միջնորդության հարցը քվեարկության դրվեց: Անդամները միաձայն կողմ քվեարկեցին միջնորդությանը և նիստը հետաձգվեց :

Հիշեցնենք՝ ԲԴԽ անդամ Հայկ Հովհաննիսյանին կարգապահական պատասխանատվության ենթարկելու վարույթ է ներկայացվել այն ժամանակ, երբ նա իր դիրքորոշումն է արտահայտել ԲԴԽ-ի կողմից  լիազորությունները դադարեցված դատավոր Արայիկ Մելքումյանի մասին։