Ինչո՞ւ է Իտալիայում և Մալթայում ՀՀ դեսպանը հետ կանչվել

 Իտալիայի Հանրապետությունում եւ Մալթայի Հանրապետությունում ՀՀ արտակարգ եւ լիազոր դեսպան Վիկտորիա Բաղդասարյանը (նստավայրը՝ Հռոմ) հետ է կանչվել զբաղեցրած պաշտոնից։ 

«Ա1+»-ը հետկանչի պատճառների մասին իմանալու համար կապ հաստատեց Արտաքին գործերի նախարարության մամուլի քարտուղար Աննա Նաղդալյանի հետ։ 

«Արտաքին գործերի նախարարությունում գոյություն ունի բնականոն ռոտացիոն կարգ, և այդ հրամանը պետք է դիտել այդ համատեքստում։ Մեզ մոտ կա դիվանագետների, դեսպանների ռոտացիոն կարգ, ըստ որի՝ նրանք նշանակվում են որոշակի ժամանակով»,- նշեց ԱԳՆ մամուլի խոսնակը։

Հարցին՝ ո՞վ է հաջորդ դեսպանը լինելու, Նաղդալյանը պատասխանեց, որ չի կարող ասել, մինչև նախագահի հրամանագիրը չլինի․ մինչ նախագահի հրամանագիրը դեսպանների նշանակման և հետ կանչման վերաբերյալ մեկնաբանություն ԱԳՆ-ն չի տալիս։ 

ՀՀ Սահմանադրության 132-րդ հոդվածի (Հանրապետության նախագահի լիազորություններն արտաքին քաղաքականության բնագավառում) 1-ին մասի 2-րդ կետի համաձայն՝ նախագահը վարչապետի առաջարկությամբ նշանակում և հետ է կանչում օտարերկրյա պետություններում և միջազգային կազմակերպություններում դիվանագիտական ներկայացուցիչներին.

Նշենք, որ Վիկտորիա Բաղդասարյանը  Մալթայում և Իտալիայում դեսպան է եղել 2016 թվականից։