A
A
Սահմանափակումները չեն տարածվի սրճարանների, համացանցի միջոցով խաղերի վրա․ Էկոնոմիկայի փոխնախարար (տեսանյութ)
Աջակցիր «Ա1+»-ինՀՀ էկոնոմիկայի նախարարի տեղակալ Վարոս Սիմոնյանը, անդրադառնալով պարետի որոշմամբ նախատեսված սահմանափակումներին, նշեց, թե որոնք են դրանք․
«Սահմանափակումներ կգործեն բարերի, խմիչքների, համանման կետերի գործունեության հետ կապված, կինոների և տեսաֆիլմերի ակումբների նկատմամբ, շահումով խաղերի կազմակերպման գործունեության հետ կապված, ինչպես նաև սպորտի, զվարճությունների և հանգստի կազմակերպման բնագավառներում»։
Սահմանափակումները, ըստ փոխնախարարի, տարածվում են նաև անհատական տնտեսական գործունեություն ծավալող ծառայությունների վրա՝ բացառությամբ թաղումների կազմակերպման և համանման ծառայությունների։
Սահմանափակումների վերաբերյալ տնտեսական գործունեություն ծավալող կառույցների ամբողջական ցանկին, Սիմոնյանի փոխանցմամբ, կարելի է ծանոթանալ Էկոնոմիկայի նախարարի 2013 թվականի հրամանով սահմանված դասակարգիչների ցանկի միջոցով։
Լրագրողների հետ հանդիպմանը փոխնախարարը նշեց՝ սահմանափակումները չեն տարածվի սրճարանների, համացանցի միջոցով խաղերի և վիճակախաղերի անցկացման, խմիչք վաճառող շարժական և այլ կետերի վրա։
Անդրադառնալով Իրանի, Վրաստանի հետ բեռնափոխադրումների հարցին՝ Էկոնոմիկայի նախարարի տեղակալը նշեց, որ պարետի որոշմամբ սահմանվել է ապրանքների ցանկը, որոնք չեն կարող փոխադրվել, առողջապահական պարագաների փոխադրումը կատարվում է Առողջապահության նախարարության հետ համաձայնությամբ, իսկ մնացած փոխադրումները՝ Պետական եկամուտների կոմիտեի հետ հսկողության ներքո։
«Առավոտ» կայքը հարց էր ուղղել. «Բանկերն ի աջակցություն ոիզնեսին վարկային աջակցություն տրամադրեցին, սակայն «Առավոտ»-ը փոքր և միջին բիզնեսից ահազանգեր է ստանում, որ տարածքի սեփականատերերը, որոնցից տարածքներ են վարձակալում, հայտարարում են, որ տեղի գումարները պետք է վճարել։ Արտակարգ դրության պայմաններում կառավարությունը լծակներ ունի՞ խոշոր սեփականատերերի հետ բանակցելու, այդ հարցերում որոշակի լուծումներ գտնելու»։
Փոխնախարարը պատասխանեց.
«Այս հարցերը կարելի է դիտարկել ամբողջ աջակցության փաթեթում, որն այս պահին դրված է հանրային քննարկման։ Իմ գործընկերները զբաղվում են, քննարկումներ են իրականացնում տնտեսվարողների հետ։ Եվ կարծում եմ՝ կտրվի այն լուծումը, որ կբավարարի թե՛ տնտեսվարողներին մի կողմից, և թե՛ ՓՄՁ այն սուբյեկտներին, որոնք վարձակալում կամ այլ տեսակի գործունեություն են ծավալում»։