Լեգենդար Շավարշ Կարապետյանը՝ Բաշկիրիայի նախագահի խորհրդական
Աջակցիր «Ա1+»-ինԱշխարհահռչակ սուզալողորդ Շավարշ Կարապետյանը նշանակվել է Ռուսաստանի Ֆեդերացիայի կազմի մեջ մտնող Բաշկիրիայի Հանրապետության նախագահի խորհրդական: Այդ մասին հայտնում է bashinform.ru կայքը:
Հրամանն անձամբ ստորագրել է Բաշկիրիայի ղեկավար Ռադի Խաբիրովը: Շավարշ Կարապետյանը հիմնականում կզբավի այդ հանրապետության ֆիզկուլտուրայի և սպորտի զարգացման հարցրերով:
Տեղեկություն.
Շավարշ Վլադիմիրի Կարապետյանը ծնվել է 1953թ մայիսի 19-ին, Կիրովականում: Մինչեւ 17 տարեկանը զբաղվել է լողով, սակայն մարզիչները նրան, այնուամենայնիվ, հեռացրել են թիմից: Դրանից հետո նա մարզիչ Լիպարիտ Ալմասակյանի գլխավորությամբ զբաղվել է սուզալողով:
Շավարշ Կարապետյանն աշխարհի 17-ակի և Եվրոպայի 13-ակի չեմպիոն է, աշխարհի 11-ակի ռեկորդակիր: Պարգևատրվել է «Պատվո նշան» շքանշանով և UNESCO-ի «Արդար խաղ» մրցանակով։ 2010 թվականի մայիսի 24-ին ՀՀ Նախագահի հրամանագրով պարգևատրվել է Արիության մեդալով:
Սակայն, Շավարշ Կարապետյանն աշխարհին ավելի շատ հայտնի է իր սխրագործություններով: 1974 թվականի հունվարի 8-ին նա Ծաղկաձորից ավտոբուսով վերադառնալիս փրկում է ուղևորներին վերահաս վտանգից, երբ վերելքի վրա վարորդը դուրս է գալիս շարժիչի անսարքությունը պարզելու համար, իսկ մեքենան շարժվում է տեղից։ Մարզիկը արմունկով ջարդել է վարորդի խցիկի ապակյա պատը և ավտոբուսը ուղղել դեպի սար և կանգնեցրել։
1976 թվականի սեպտեմբերի 16-ին նա իր եղբոր՝ Կամո Կարապետյանի հետ փրկել է Երևանյան լիճը ընկած տրոլեյբուսի ուղևորներին: 10 մետր խորության վրա, զրոյական տեսանելիության պայմաններում, Շավարշ Կարապետյանը ոտքերով կոտրել է տրոլեյբուսի հետին ապակին և մեկ առ մեկ դուրս բերել 20 ուղևորի։
Դրանից հետո նա հիվանդացել է թոքերի բորբոքումով, սակայն անվախ մարզիկը մեկ տարի անց կրկին վերադարձել է լողուղի, հաղթել Եվրոպայի առաջնությունում և սահմանել թվով 11-րդ ռեկորդը: Հետագայում հիվանդության պատճառով ստիպված ավարտել է ելույթները:
1985թ փետրվարի 15-ին Շավարշ Կարապետյանն առաջինն է օգնության հասել Ծիծեռնակաբերդի մարզահամերգային պալատում բռնկված հրդեհի դեմ պայքարող հրշեջներին:
1991 թվականից նա ընտանիքի հետ ապրում է Մոսկվայում։ Սուզալողի ռուսական ֆեդերացիայի պատվավոր նախագահն է: