Ո՞ր տեղեկության տարածման համար է տուգանք սահմանվում․ հարց փոխնախարարին (տեսանյութ)
Աջակցիր «Ա1+»-ին«Բարգավաճ Հայաստան» խմբակցության քարտուղար Արման Աբովյանին հետաքրքրում է, թե ֆիզիկական և իրավաբանական անձանց կողմից արտակարգ դրության ժամանակ ո՞ր տեղեկության տարածման համար է տուգանք սահմանվում Վարչական իրավախախտումների վերաբերյալ օրենսգրքում, և եթե ֆեյսբուքյան օգտատերից մեկը գրառում է կատարում, և մեկ այլ օգտատերը կիսվում է դրանով, իրենցից ո՞ր մեկն է պատասխանատվության ենթարկվելու։
Արդարադատության փոխնախարար Վահե Դանիելյանը պարզաբանեց, խոսքը արտակարգ դրության վերաբերյալ Կառավարության որոշման հավելվածի 23-րդ կետում արգելված տեղեկատվության մասին է։
«Ինչպիսին է օրինակ՝ կորոնավիրուսի առկա և նոր դեպքերի անձանց առողջական վիճակի, նրանց հետ շփված անձանց քանակի թեստավորման շրջանակի, նաև մեկուսացվածների քանակի վերաբերյալ, ինչպես նաև խուճապի հանգեցնող կամ խուճապային իրադրություն ստեղծելու վտանգ պարունակող տեղեկատվությունները»,- մանրամասնեց փոխնախարարը։
Վահե Դանիելյանը հավելեց, որ քննարկման առարկա է դարձել խուճապի հանգեցնող եզրույթը և Կառավարությունը հաշվի առնելով այդ մտահոգությունը, փոփոխություններ է կատարել և փորձել է հնարավորինս հստակեցնել այդ եզրույթը։
«Խոսքը վերաբերում է ակնհայտ խուճապ առաջացնող դեպքերին, և նաև պետք է իրական վտանգ առաջացնի, միայն այդ դեպքում կարող են անձինք պատասխանատվության ենթարկվել»,- հավելեց նա։
Մանրամասները՝ տեսանյութում։
