Իմ կարծիքով՝ եթե չներկայանալը գործատուի հրահանգով է, պետք է աշխատանքի վարձատրությունը պահպանվի․ Անանյան (տեսանյութ)
Աջակցիր «Ա1+»-ինՊԵԿ-ն աշխատելու է բնականոն ռեժիմով՝ իրականացնելով իր գործառույթներն ամբողջ ծավալով, Կառավարության մամուլի սրահում հրավիրված ասուլիսում հայտարարեց Պետեկամուտների կոմիտեի նախագահ Դավիթ Անանյանը:
Կառավարության այսօրվա նիստում որոշում կայացվեց աջակցություն տրամադրել բիզնեսին: Լրագրողները ՊԵԿ նախագահից հետաքրքրվեցին՝ ի՞նչ սկզբունքով և ընթացակարգերով է տրամադրվելու այդ աջակցությունը:
Անանյանն ասաց՝ ուսումնասիրել են միջազգային փորձը, հաշվի են առել մեր տնտեսության առանձնահատկությունները, ինչպես նաև հարկ վճարելու մշակույթի ոչ այնքան գոհացուցիչ մակարդակը և նաև այն հանգամանքը, որ վերջին շրջանում փոքր-ինչ բարելավվել է տնտեսվարողների կողմից պարտաճանաչ հարկեր վճարելու իրավիճակը։ Արդյունքում որոշել են ձեռնպահ մնալ հարկային արտոնություններ և արձակուրդներ տրամադրելու մոտեցումից.
«Որոշեցինք, որ Կառավարությունը կտա հասցեական սուբսիդիաներ, օժանդակություններ՝ շատ դեպքերում բանկային համակարգի ներդրմամբ, շատ դեպքերում՝ ուղղակի»:
ՊԵԿ նախագահը տեղեկացրեց՝ նախագիծը կամբողջականանա այսօր ու վաղը, և մոտ երկու օրից տնտեսվարողներին կառաջարկեն աջակցության կոնկրետ ձևեր:
Ուշադրության առանցքում են լինելու զբոսաշրջության, հյուրանոցային տնտեսության, հանրային սննդի և մի շարք այլ ոլորտներ,-վստահեցնում է ՊԵԿ նախագահը և հավելում՝ այս իրավիճակում առավելապես խոցելի են նշված ոլորտի տնտեսվարողները:
«Մենք ընտրել ենք հասցեական փոխառությունների տրամադրման, փոխառության տոկոսների սուբսիդավորման, փոխառությունների համաֆինանսավորման գործիքի կիրառման, վերաֆինանսավորման գործիքի կիրառման, սոցիալական օժանդակությունների կիրառման և այլ մեթոդեր»:
Հարցին, թե կազմակերպությունը արտակարգ դրության պայմաններում ունի՞ արդյոք իրավունք օրավարձով աշխատողներին չվճարելու, Անանյանն ասաց, որ այստեղ աշխատանքային օրենսդրության մեկնաբանման հարց է.
«Իմ կարծիքով՝ եթե աշխատանքի չներկայանալը գործատուի հրահանգով է, պետք է աշխատանքի վարձատրությունը պահպանվի»:
Ինչ վերաբերում է արտակարգ պայմաններում պետբյուջեի եկամուտների հավանական նվազմանը և հնարավոր ռիսկերին, Անանյանն ասաց՝ ինչպես վարչապետն է ասել, մենք այսօր պատկերացնում ենք, որ երեկվա աշխարհը և երեկվա տնտեսությունը գոյություն չունեն, և այս պայմաններում, ըստ Անանյանի, այսօր այդ խնդրի մասին խոսելը հիպոթետիկ հարց է, ուստի ինքը պատրաստ չէ ասել, թե որքան կլինի եկամուտների նվազումը:
Այնուամենայնիվ, ՊԵԿ ղեկավարը վստահեցրեց, որ պատրաստ են բոլոր զարգացումներին:
Լրագրողներից մեկը հետաքրքվեց, թե արտակարգ դրության պայմաններում ավելացե՞լ են արդյոք տնտեսվարողների կողմից ՀԴՄ կտրոն չտրամադրելու դեպքերը, Անանյանն ասաց՝ ապրանքաշրջանառության ծավալներն ընկել են, ՀԴՄ-ների քանակը նվազել է, և սա պայմանավորված է հանրային սննդի ոլորտի պասիվ վիճակով:
«Առևտրի ոլորտում կա որոշակի տեղաշարժ նաև դրական առումով, 40-45 տոկոսանոց աճ բայց, օրինակ, մարտի 16-ին տպվել է շուրջ 1.3 մլն ՀԴՄ, մարտի 12-ին տպվել է շուրջ 1.5 մլն ՀԴՄ, այսինքն՝ արանքում եղել են անկումներ և վերելքներ, բայց էական փոփոխությունները , կարծում եմ, դեռ առջևում են»:
Վստահեցրեց՝ ՀԴՄ-ների վերահսկողության առումով իրավիճակը նույնն է: