Արամ Մանուկյանը վարչապետին ու ԱԺ նախագահին է փոխանցել «ապօրինի վճիռ կայացրած դատավորների ցանկը» (տեսանյութ)
Աջակցիր «Ա1+»-ինԱզգային ժողովում ՀՀ դատական օրենսգրքի ու հարակից օրենքների նախագծերի փաթեթի խորհրդարանական լսումների ընթացքում ՀԱԿ փոխնախագահ Արամ Մանուկյանը հայտնեց, որ ՀՀ վարչապետին ու ԱԺ նախագահին է փոխանցել ապօրինի վճիռ կայացրած դատավորների ցանկը, ովքեր Մանուկյանի խոսքով՝ «մեղք են գործել արդարադատության առաջ, վարկաբեկել են ՀՀ դատական համակարգը և Հայաստանի դատական համակարգը։
«Արդյունքն այն է, որ ՄԻԵԴ–ից գալիս են վճիռներ (գնալով` ավելի շատ), թե այդ ընթացքում որքան ապօրինի վճիռներ են կայացվել, որքան մարդկանց իրավունքներ են ոտնահարվել, և մեր երկիրը դեռ շատ երկար ֆինանսական վնասներ է կրելու այդ ապօրինի վճիռների հետ կապված»,- ասաց Մանուկյանը։
Նրա պնդմամբ՝ նախատեսվող կարգապահական վարույթներ հարուցելու համար սահմանված 8 տարվա վաղեմության ժամկետը խնդրահարույց է, և Հայաստանում կիրառելի չէ։
Ըստ Մանուկյանի՝ սա անօրինական վճիռներ կայացրած դատավորներին, Մարտի մեկի գործով դատավորներին պատասխանատվությունից «պլստալու» հնարավորություն է տալիս։
«Ժամկետ չպիտի դրվի այստեղ, որովհետև վաղվա համար, մյուս օրվա համար, հետո եկողների համար ցանկացած դատավոր պետք է իմանա, որ իր խախտումը երբևէ իշխանափոխության հետ էլ չի կարող ներվել, մարսվել, անցնել»։
Մանուկյանը՝ հույս հայտնեց, որ այս հնարավորությունն օրենքում տրվել է չգիտակցված ձևով։
«Մեր մոտեցումներն այս առումով շատ խիստ են։ Սա ձեր հեղափոխության պարտադիր ատրիբուտներից մեկը պետք է լինի։ Բոլոր այն դատավորները, որոնք մեղք են գործել և՛ սեփական երկրի, և՛ միջազգային հանրության, և՛ օրենքի առջև, պետք է պատասխանատվության ենթարկվեն գոնե համակարգից հեռացվելու ձևով»։
Մանուկյանը, դիմելով իշխանության ներկայացուցիչներին, ասաց․
«Դուք պաշտպանության տակ եք վերցնում Մարտի 1-ի գործով և Բուզանդի գործով ապօրինի վճիռներ կայացրած հանցագործ դատավորների իրավունքները»։
