Եթե Փարաջանովը կենդանի լիներ, կարծում եմ, իմ այս համեստ նվերը կընդուներ․ Արթուրո Սայան (տեսանյութ)

Կինոյի տան կինոսրահում կայացավ գերմանաբնակ ռեժիսոր, ծնունդով Վանաձորից Արթուրո Սայանի «#Maestro95» ֆիլմի ցուցադրությունը, նվիրված Սերգեյ Փարաջանովի ծննդյան 95-ամյա հոբելյանին: 

Ֆիլմի հեղինակի բնորոշմամբ, իր ձևաչափով սա ֆիլմ-կոլաժ է՝ գեղարվեստական-փաստավավերագրական ֆիլմ, զուգակցված ֆիլմ-էսսեի և անիմացիայի տարրերով: 

Արթուրո Սայանի խոսքով, քանի որ տիկնիկները մեծ դեր են ունեցել  Փարաջանովի կոլաժներում, ինքն էլ որոշել է օգտագործել  կերպարային տիկնիկների և ֆիլմում Փարաջանովի, Սոֆիկո Ճիաուրելիի, Սայաթ-Նովայի և այլոց կերպարները ներկայանում են նաև տիկնիկների տեսքով: Ֆիլմում օգտագործված արխիվային որոշ կադրեր  ցուցադրվում են առաջին անգամ։

Նկարահանման  աշխատանքներին  աջակցել են  Գերմանիայում ՀՀ դեսպանությունը և Մութեզիուսի անվան արվեստի ինստիտուտը, որտեղ ուսանում է Արթուրոն։ Ֆիլմի ստեղծման համար ծախսվել է 5500 եվրո։

Սա երիտասարդ ռեժիսորի առաջին լիամետրաժ ֆիլմն է։

 «Ա1+»-ի հարցին, թե նրա կարծիքով, ինչ կասեր ինքը՝ Փարաջանովը այս ֆիլմի մասին, եթե կենդանի լիներ, Սայանը պատասխանեց․ «Կարծում եմ, իմ այս համեստ նվերը կընդուներ»։