Այդ ընկերությունները կստանային թույլտվություն, եթե նվեր չտային․ Նազարյանը՝ նվիրատվությունների մասին (տեսանյութ)
Աջակցիր «Ա1+»-ինԱզգային ժողովում հայտարարություններին ժամին խորհրդարանի փոխխոսնակ Լենա Նազարյանն անդրադարձավ վերջին օրերին լայն քննարկումների առիթ դարձած Երևանին նվիրաբերած աղբատար մեքենաների և դրանց դիմաց ստացած շինթույլտվությունների թեմային։
Լենա Նազարյանը նախ հիշեցրեց, որ 2017 թ․-ին ինքը և Կրթության, գիտության, մշակույթի և սպորտի նախարար Արայիկ Հարությունյանը, երբ նրանք Երևանի ավագանու «Ելք» խմբակցության անդամներ էին, դիմել են «Երևան» հիմնադրամին և խնդրել տրամադրել իրենց նվիրատուների ցանկը, սակայն նրանց մերժել են։
«Մեզ մերժեցին, այդ տեղեկությունը չհրապարակեցին։ Մեր խնդիրն էր պարզել, թե արդյո՞ք այդ նվիրատվությունները անշահախնդիր էին արվել և դրանց դիմաց ընկերությունները կամ անհատները չեն ստացել ինչ-որ արտոնություններ»,- նշեց Լենա Նազարյանը։
ԱԺ փոխխոսնակն ասաց, որ այն ժամանակ իրենք նույնիսկ չունենին տվյալներ, թե ովքեր են նվիրատվությունները կատարել, իսկ հիմա տեղեկատվությունը բաց է և բոլորին հայտնի է, թե քաղաքապետարանին ովքեր են նվիրել աղբատար մեքենաներ։
«Մենք կարող ենք համեմատել և վերլուծել, թե արդյոք այդ ընկերությունները կստանային թույլտվություն, եթե նվեր չտային։ Կարծում եմ, որ այո, այդ ընկերությունները կստանային թույլտվություն, ինչպես ստացել են այլ ընկերություններ՝ առանց նվերներ տալու, քանի որ նրանց պահանջը օրինական է եղել»,- ելույթ ունենալով ասաց Լենա Նազարյանը։
