Սիսակ Գաբրիելյանը՝ Արսեն Բաբայանի նկատմամբ անձնական երաշխավորություն կիրառելու իր դիմումի մասին (տեսանյութ)
Աջակցիր «Ա1+»-ին«Իմ քայլը» խմբակցության պատգամավոր Սիսակ Գաբրիելյանը Ազգային ժողովի աշխատակազմի ղեկավարի նախկին տեղակալ Արսեն Բաբայանի նկատմամբ կիրառված խափանման միջոց կալանավորումը փոփոխելու և նրա նկատմամբ որպես խափանման միջոց անձնական երաշխավորությունը կիրառելու վերաբերյալ դիմումը գրել է քաղաքական թիմի հետ քննարկումներից հետո:
Այս մասին ԱԺ-ում լրագրողների հետ զրույցում ասաց պատգամավորը:
«Քաղաքական թիմիս դիրքորոշումը համապատասխանում է իմ միջնորդությունը ներկայացնելու հետ: Որևէ խնդիր չկա, մեղադրանքի բովանդակությանը չեմ ուզում անդրադառնալ, դա իմ գործը չէ: Իմ խորին համոզմամբ՝ այս փուլում ինքը չի խոչընդոտի նախաքննությանը»,- ասաց պատգամավորը և հավելեց, որ իր հիմնավորմանս մեջ՝ ուղղված դատախազին, նշել է, որ Արսեն Բաբայանին ճանաչել է դեռևս լրագրողական տարիներից և ճանաչում է նրա տեսակը:
«Վստահությունս գալիս է նախկինում իրեն ճանաչելուց: Այսինքն ես հասկանում եմ, որ հետագայում, եթե նա չներկայանա իրավապահ մարմիններին, ես եմ ընկնելու քրեական պատասխանատվության տակ: Վստահությունս գալիս է իրեն ճանաչելուց, և ես կարծում եմ, որ բանը դրան չի հասնի, որ ես քրեական պատասխանատվության ենթարկվեմ»,- ընդգծեց Սիսակ Գաբրիելյանը:
Նա Արսեն Բաբայանին քաղբանտարկյալ չի համարում:
Հիշեցնենք, որ «Հայաստանի Հելսինկյան կոմիտե» հասարակական կազմակերպության նախագահ Ավետիք Իշխանյանի և ՀՀ ԱԺ պատգամավոր Սիսակ Գաբրիելյանի կողմից ներկայացվել էին մեղադրյալ Արսեն Բաբայանի նկատմամբ որպես խափանման միջոց անձնական երաշխավորությունը կիրառելու վերաբերյալ դիմումներ՝ որպես երաշխիքի գումար, 500.000-ական ՀՀ դրամ փոխանցելու վերաբերյալ անդորրագրերի պատճեների հետ միասին՝ 2019 թվականի նոյեմբերի 12-ին որոշում է կայացվել մեղադրյալ Արսեն Բաբայանի նկատմամբ կիրառված խափանման միջոց կալանավորումը փոփոխելու և նրա նկատմամբ որպես խափանման միջոց անձնական երաշխավորությունը կիրառելու վերաբերյալ:
Տեսանյութը՝ քիչ անց: