Չեն կարող այսքան ապազգային որոշումները պատահականության հետևանք լինել․Կարին Տոնոյան (տեսանյութ)
Աջակցիր «Ա1+»-ինԱյսօր ԿԳՄՍ նախարարության շենքի մոտ բողոքի ակցիա իրականացնող երիտասարդներին միացել էր նաև «Հայ ասպետ» հիմնադրամի հիմնադիր տնօրեն Կարին Տոնոյանը։
Վերջինս լրագրողների հետ զրույցում հայտարարեց, որ մեզ ղեկավարող մարդկանց մեջ ուզում է տեսնել ազգային, ժողովրդամետ մարդիկ, ովքեր «այս փոքր ազգը այս վտանգավոր տարածաշրջանում հզորացման խնդիր են լուծելու»․
«Ես չեմ ուզում իմ տեսակը կորցնել։ Ինչ-որ կասկածելի ֆինասավորմամբ հայ գրականության դասագրքերը ուսումնասիրվել են, հաշվել են՝ այնտեղ քանի անգամ է «ազգ» բառն օգտագործված, «հայրենիք» բառը օգտագործված, և համարում են դա այլ ազգերի նկատմամբ անհանդուրժողականության դրսևում»։
Կ․ Տոնոյանի խոսքերով՝ ժողովուրդը պետք է հասկանա՝ ինչեր են կատարվում մեր երկրում, ով է դրա հետևում կանգնած, և որն է նպատակը․
«Ես միացել եմ այս քաղաքականության հրաժարականի պահանջին՝ դա կլինի նախարարի տեսքով, փոխնախարարի տեսքով, ում տեսքով կուզեք։ Այս քաղաքականությունը մեր երկրում այլևս չպետք է տարվի, անընդհատ ինչ-որ բաներ ենք տեսնում, որոնց բացատրությունը անգամ վախենում ենք տանք»։
Կարին Տոնոյանն ասում է՝ չեն կարող այսքան ապազգային որոշումները պատահականության հետևանք լինել։
