Վիտալի Բալասանյանը անում է չափազանց անհեթեթ հայտարարություններ․ Տաթևիկ Հայրապետյան (տեսանյութ)
Աջակցիր «Ա1+»-ինԱզգային ժողովի «Իմ քայլը» խմբակցության պատգամավոր Տաթևիկ Հայրապետյանը ասում է՝ տխրում է, երբ Արցախի հերոս, Արցախի Անվտանգության խորհրդի նախկին քարտուղար Վիտալի Բալասանյանը քայլ առ քայլ վարկաբեկում է ինքն իրեն։ Մինչդեռ, ըստ պատգամավորի՝ Վիտալի Բալասանյանի վաստակը Արցախյան ազատամարտում, ինչպես նաև 2016 թ․ ապրիլին, անուրանալի է։
«Վիտալի Բալասանյանը, ներքաշվելով նման քաղաքական դիրսկուրսների մեջ, անում է չափազանց անհեթեթ հայտարարություններ, որոնց լուրջ վերաբերվել հնարավոր չէ։ Նա փորձում է ինչ-որ ալիք առաջ բերել, մինչդեռ, ծանոթ լինելով արցախցիների մոտեցումներին, գիտեմ, որ այդ դիրքորոշումը որևէ ազդեցություն չի կարող վայելել Արցախում, ավելին՝ նրանք նույնիսկ քննադատում և ամաչում են նման հայտարարությունների համար, որոնք հնչում են Արցախից»,- «Ա1+»-ի հետ զրույցում ընդգծեց պատգամավորը։
Տաթևիկ Հայրապետյանի համոզմամբ՝ երկու հայկական պետությունների հարաաբերություններում նեղ անձնական շահերը տեղ չունեն։
«Իմ դիտարկմամբ, միգուցե կան որոշ չփակված հաշիվներ «Սասնա ծռերի» որոշ ներկայացուցիչների հետ, և այդ անձնական խնդիրները հանրայնացվում են, և դրանց փորձում է տրվել Հայաստան-Արցախ հարաբերությունների ֆոնին գնահատականներ, որոնք անթույլատրելի են»,- ասաց պատգամավորը։
Նշենք, որ Վիտալի Բալասանյանը հարցազրույց է տվել լրատվական կայքերից մեկին, որում ասել է․
«Մենք 2016-ին ներեցինք այդ ահաբեկիչներին, չսպանեցինք, հիմա հայտարարում եմ` բոլորին ֆիզիկապես ոչնչացնելու ենք, ովքեր կփորձեն ոտնձգություն իրականացնել թե՛ իմ, թե՛ ժողովրդի, թե՛ պետության, թե՛ սահմանների, ու թե՛ Ղարաբաղի իշխանությանը»:
Մանրամասները՝ տեսանյութում:
