Ցանկացած մշակութային հուշարձան պետք է նաև կոլորիտ, ձայն ու պատկեր ունենա. Արա Թարվերդյան
Աջակցիր «Ա1+»-ին«Բացի հուշարձանների պահպանությունից՝ մեր գործառույթն է նաև դրանց հանրահռչակումը»,- ասում է «Պատմամշակութային արգելոց-թանգարանների և պատմական միջավայրի պահպանության ծառայություն» ՊՈԱԿ-ի տնօրեն Արա Թարվերդյանը` նշելով, որ ցանկացած մշակութային հուշարձան պետք է ունենա նաև ձայն, պատկեր ու կոլորիտ:
«Մեր որդեգրած նոր` ինտենսիվ զարգացման քաղաքականության արդյունքում վերջին 2 տարում այդպիսի միջոցառումները ավելի են շատացել»,-նշում է Արա Թարվերդյանը և տեղեկացնում,որ սեպտեմբերի 28-ին և 29-ին՝ Եվրոպական ժառանգության օրերի շրջանակներում, բոլոր արգելոց-թանգարաններում սպասվում են մշակութային միջոցառումներ:
«Զուգահեռ Ամբերդում մենք անելու ենք «Ծաղրածուների փառատոնը», որը կազմակերպում ենք ամեն տարի և աշխատելու ենք այն դարձնել միջազգային փառատոն»:
ՊՈԱԿ փոխտնօրեն Խորեն Գրիգորյանն էլ նշեց, որ մեկ այլ միջոցառում անցկացվելու է Լոռու բերդում:
«Ամբողջ միջոցառումը լինելու է բեմականացված, և Կյուրիկե իշխանն ինքը ուղեկցելու է այցելուներին ու պատմելու բերդի մասին: Ամբողջովին ներկայացվելու է միջնադարյան կենցաղը, մենք ցույց ենք տալու հայ հանրությանը և օտարերկրացիներին, թե ինչպիսի մշակույթ, իշխանություն և արքունական վարք ենք ունեցել մենք` որպես թագավորություն»:
Միջոցառումն այս տարի համընկել է Լոռու բերդի հիմանդրման 999-ամյակի հետ: Ընթացքում ռոք խմբերի կողմից հնչելու են միջնադարյան երաժշտության հիմքի վրա ստեղծված երգեր:
Ամբերդում և Լոռու բերդում անցկացվող միջոցառումների մուտքը ազատ է այցելուների համար:
Հանդիպման վերջում Արա Թարվերդյանն անդրադարձավ նաև պատմամշակութային հուշարձանների պահպանության հարցին` նշելով,որ այս հարցում շատ կարևոր են հանրության ընկալումն ու գործողությունները.
«Պետք է հանրային միջավայրում ստեղծվի նոր գիտակցություն հուշարձանների հանդեպ, որ նրանք չձգտեն դրանք փչացնել, իսկ մենք շարունակենք պահպանել»: