Պահը, որ ներկա էր, դառնում է անցյալ ու պատմություն․ «Հավերժի ճամփորդ»-ը՝ լուսանկարներում
Աջակցիր «Ա1+»-ինԺամանակը փոխում է մարդկային ձեռագիրը, հագուկապը, դիմագիծն ու հայացքը: Պահը, որ ներկա էր, դառնում է անցյալ ու պատմություն:
Փոխվում են դեմքերն ու առարկաները, պատմություն են դառնում նաև ժապավենի վրա արված լուսանկարները, և ժապավենին գալիս է փոխարինելու թվային ֆոտոխցիկը:
Ներկայի ու անցյալի պատմության մեջ, սակայն հավերժ է երկիրը:
Հովհաննես Շարամբեյանի անվան ժողովրդական արվեստի կենտրոնում բացվել է լուսանկարիչ Գագիկ Գասպարյանի «Հավերժի ճամփորդը. Հայաստան» խորագրով ցուցահանդեսը՝ նվիրված Հայաստանի անկախության տոնին:
«Աշխատել եմ Հեռուստատեսության և ռադիոյի պետական կոմիտեում, հեռուստաֆիլմերի «Երևան» ստուդիայում, Հուշարձանների պահպանության և վերականգնման վարչությունում»,-ասում է լուսանկարիչը:
«Որպես օպերատոր նկարահանումներ էի անում, ազատ ժամանակ էլ լուսանկարներ: Չեմ սիրել բեմադրած լուսանկարներ, քանի որ իրականը դառնում է մի տեսակ արհեստական, կաշկանդում թե քեզ, թե լուսանկարվողին»:
Առաջին անգամ չէ, որ ցուցադրվում է, բայց այս լուսանկարները ցուցադրել է առաջին անգամ: Ասում է՝ նկարների ընտրությունը թերևս ամենաբարդն էր: Հիմնականում 80-ականների գործեր են: Հեռուստաթատրոնի ու ֆիլմերի նկարահանման ընթացքում արված լուսանկարներ, բնանկարներ, հանրահավաք, ծանոթ ու անծանոթ դեմքեր:
Ցուցահանդեսը բաց կլինի մինչև սեպտեմբերի 29-ը: