Գործ ունենք մի երևույթի հետ, երբ մարդուն բռնում են, հետո որոշում՝ ինչ անել․ Ռուբեն Մելիքյան (տեսանյութ)
Աջակցիր «Ա1+»-ինՍահմանադրական դատարանի հետ կապված գործընթացն աննախադեպ է, կարևոր է, որպեսզի հասարակությունը իմանա, թե այն ինչ վտանգներ կարող է ունենալ։ Լրագրողների հետ հանդիպմանը նման կարծիք հայտնեց փաստաբան Ռուբեն Մելիքյանը։
«Այսկերպ գործելով՝ իշխանությունը ցանկանում է Սահմանադրական դատարանի հանդեպ վերահսկողություն իրականացնի։ Եթե դատավորը այս -այս խախտումներն է արել, պատկերացնո՞ւմ եք՝ ինչքան բարձր շեմ պետք է դրված լինի, որ դատավորի գործողությունը դադարեցվի։ Բայց մենք այդ հիմքերը չենք տեսնում, ստացվում է մի իրավիճակ, ինչը, կարծում էի, որ մենք վերջնականապես ենք հաղթահարել, երբ մարդուն ձերբակալում էին, հետո սկսում էին մտածել՝ ինչ մեղադրանք առաջադրեն։ Հիմա գործընթաց են սկսում, և պետք է հանրությանը ներկայացնեն, թե ինչ հիմնավորումներ կան՝ այդ գործընթացը սկսելու համար»,- ասաց նա։
Փաստաբան Լուսինե Սահակյանը կարծում է, որ Սահմանադրական դատարանի հանդեպ գործադրվող ճնշումները հարիր չեն իրավական պետությանը։
«Այսկերպ գործադիր մարմինը փորձում է իր հսկողությունը սահմանել բոլոր դատարանների վրա, այդ թվում՝ նաև Սահմանադրական դատարանի նկատմամբ և տեսնելով, որ չի կարողանում իր հսկողությունը տարածել՝ դիմում է նման քայլերի։Մենք պետք է հասկանանք, որ այստեղ Ռոբերտ Քոչարյանի դատավարությունը չէ, և պետք է հասարակությունը հասկանա, որ մի գործով պայմանավորված՝ չի կարող երկիրը կործանվել։ Չի կարող գործադիր իշխանությունը միջամտի դատական իշխանությանը, սա լուրջ խնդիրներ է առաջացնում պետության համար։ Հարցը հասել է նրան, որ պատգամավորները հնչեցնում են կարծիք, որ եթե «Իմ քայլը» խմբակցությունը մի բան ցանկանում է, ոչ մեկ խոսելու իրավունք չունի։ Սա լուրջ մարտահրավեր է իրավական պետությանը»։
