Հեռացողները խոսում են անհարգալից․ Գորգիսյանը՝ Վանեցյանի հրաժարականի մասին (տեսանյութ)
Աջակցիր «Ա1+»-ին«Լուսավոր Հայաստան» խմբակցութոան պատգամավոր Գևորգ Գորգիսյանին չի գոհացնում ԱԱԾ նախկին տնօրեն Արթուր Վանեցյանի հրաժարականի ոճը։ Պատգամավորն ակնկալում է, որ յուրաքանչյուր հրաժարականի պարագայում պետք է նշվեն դրա պատճառների մասին։
«Ցավալի է, որ շարունակվում է փակ դռների հետևում մութ հրաժարականներ ներկայացնելը։ Նախկին իշխանության ժամանակ մենք ասել ենք, որ եթե ինչ-որ մեկին հեռացնում են աշխատանքից, որը կարևոր պաշտոն է զբաղեցրել, ապա պետք է պատճառների մասին նշվի, իսկ այդ պատճառների մասին ո՛չ նախկինում, ո՛չ էլ հիմա չնշվեց։ Ավելին, եթե նախկինում հեռացողները վախենում էին խոսել, հիմա հեռացողները խոսում են անհարգալից և հեգնանքով։ Օրինակ՝ Վանեցյանի հեռանալը այսպիսին էր՝ ես ձեր քաոտիկ համակարգում անելիք չունեմ, դա իմ պատվից ցածր է»,- նկատեց նա։
Պատգամավորը զերծ մնաց մեկնաբանել այն լուրերը, թե նաև ոստիկանապետ Վալերիյ Օսիպյանը և Պաշտպանության նախարար Դավիթ Տոնոյանը հրաժարականներ կներկայացնեն։ Ինչի՞ մասին է խոսում հրաժարականը, հնարավո՞ր է, որ իշխող ուժի ներսում հակասություններ են եղել, և դրան հաջորդել և կհաջորդեն հրաժարականները, հետաքրքրվեցինք Գևորգ Գորգիսյանից։
«Միայն Վանեցյանի հրաժարականը բավական էր, որպեսզի մենք տեսնենք, որ այնտեղ կան խնդիրներ։ Բոլոր հարցումներով 2-րդ տեղում Արթուր Վանեցյանն էր, և հիմա ներսում կան խնդիրներ և հատկապես հաշվի առնելով այն, թե ինչ պաշտոն էր զբաղեցնում պարոն Վանեցյանը, նա կարող է շատ վտանգավոր հակառակորդ դառնալ իշխանության համար»,- պատասխանեց նա։