Հայազգի նկարչի ստեղծագործություններն առաջին անգամ են ցուցադրվում Հայաստանում (տեսանյութ)

Աշխարհի բազմաթիվ պատկերասրահներում իր ստեղծագործություններով ներկայացած Վրաստանի վաստակավոր նկարիչ, հայազգի Լև Բայախչևի գեղանկարները առաջին անգամ են ցուցադրվում Հայաստանում։

Արվեստագետի  ծննդյան 89-ամյակի կապակցությամբ SarGallery պատկերասրահում սեպտեմբերի 7-ից սկսած 3 շաբաթ ցուցադրվում են արվեստագետի 30 աշխատանքները։

Լև Բայախչևը ծնվել և ստեղծագործել է Թբիլիսիում։ Պատկերասրահի տնօրեն Արմինե Սահակյանը նշում է, որ դեռեւս  արվեստագետի կենդանության տարիներին նկարիչը ցանկացել է ներկայանալ հայրենիքում, 1990-ականներին այդ ուղղությամբ քայլեր են ձեռնարկվել, չի ստացվել։

«Լև Բայախչևի մասին ինչքան հնարավոր է շատ պետք է լուսաբանվի և խոսվի, քանի որ նա ազգությամբ հայ է և իր պատմական հայրենիքում չի  ներկայացվել»,-նշում է պատկերասրահի տնօրենը Արմինե Սահակյանը։

Լև Բայախչևի ստեղծագործություններում առանձնահատուկ տեղ է գրավում «Սայաթ նովա» շարքը, այն ավարտին հասցնելու համար նկարիչն աշխատել է երկու տարի։

«Սայաթ Նովայի ստեղծագործությունները մշտապես հուզել է ստեղծագործողին։ Նկարներից մեկում նա Սայաթ Նովային ներկայացրել է Հիսուսի կերպարում։ Նրա նկարներում մենք տեսնում ենք Սայաթ Նովայի երգերից որոշ պատառիկներ»․պատմում է Արմինե Սահակյանը։