Դուք այս բոլոր իրավիճակներում ծպտուն չեք հանել․ Բաբաջանյանը՝ իշխանական պատգամավորին (տեսանյութ)
Աջակցիր «Ա1+»-ին«Լուսավոր Հայաստան» խմբակցության պատգամավոր Արման Բաբաջանյանը չէր ցանկանում, բայց «Իմ քայլը» խմբակցության պատգամավոր Ռուբեն Ռուբինյանն իրեն ստիպեց ԱԺ ամբիոնից ելույթ ունենալ և հիշեցնել, թե ինչպես է ոտնձգություն իրականացվում Հայաստանի ինքնիշխանության նկատմամբ։
«Երբ Հայաստանում Սահմանադրական կարգը տապալելու ծանրագույն ոճրագործության մեջ մեղադրվող անձին Ռուսաստանի նախագահը շնորհավորական ուղերձ է հղում, սա սպառնալի՞ք է արդյոք մեր ինքինշխանությանը, թե՞ ոչ։ Երբ Ռուսաստանի իրավապահ համակարգը Հայաստանում հետախուզվող նախկին բարձրաստիճան պաշտոնյայի նկատմամբ շատ որոշակի վարք է դրսևորում, սա ոտնձգությո՞ւն է մեր ինքնիշխանությանը, թե՞ ոչ։ Օրերս ՌԴ Գլխավոր դատախազության որոշումը «Մարտի 1-ի» գործով անցնող մեղադրյալ ՊՆ նախկին նախարար Միքայել Հարությունյանի վերաբերյալ, սա ոտնձգությո՞ւն է մեր ինքնիշխանությանը, թե՞ ոչ։ Երբ Սահմանադրական դատարանի նախագահը հանդիպում է Հայաստանում ՌԴ դեսպանի հետ, և մենք այդ հանդիպման բովանդակության մասին չգիտենք»,- հայտարարեց պատգամավորը։
Արման Բաբաջանյանը նշեց, թե իշխանական պատգամավորները «ծպտուն չեն հանում», որովհետև համարձակություն չունեն այդ հարցերի մասին խոսել, իսկ ինքն ունի և կխոսի։
