Ինչո՞ւ է բողոքում ցմահ դատապարտյալը
Աջակցիր «Ա1+»-ինՑմահ դատապարտյալ Հունան Հունանյանը ահազանգում է, որ իրեն ստիպում են ստորագրել մի փաստաթղթի տակ, որը իրականությունը չի արտացոլում։ «Ա1+»-ի խմբագրություն զանգահարած ցմահ դատապարտյալը գտնվում է «Արմավիր» ՔԿՀ-ում։ Նա հայտարարում է, որ դատախազ Արայիկ Բրուտյանը ստիպում է իրեն բացատրություն գրել, որ նա մարտի 25-ին է տեղափոխվել «Էրեբունի» բժշկական կենտրոն, մինչդեռ ինքը մարտի 4-6-ն է գտնվել այնտեղ։
«2019 թ հուլիսի 19-ին դատախազ Արայիկ Բրուտյանը ընդունելություն է կատարում հիմնարկ, վիրավորելով ինձ, ստիպելով, որ ես իրեն ասածով տամ բացատրություն»,-մեզ հետ զրույցում պատմեց Հունան Հունանյանն ու հավելեց, որ հրաժարվել է բացատրություն տալ։
«Սուգի մեջ էի, ամսվա սկզբին կինս է մահացել. ծակոցներ ունեի, խնդրեցի, որ բժիշկ կանչեն, վեր կացավ մուննաթ-զունաթով, վիրավորեց ինձ, ես էլ ջղայնացա ու դուրս եկա, դրա հիման վրա ամսի 24-ին ինձ գրություն է եկել, որ ինձ տույժի են ենթարկել, ես էլ ասում եմ ինչի՞ համար, ես սխալ քայլ չեմ արել... Ամեն ինչ անում են, ճնշում են հոգեբանորեն, որ ես չկարողանամ ազատվել»,- շարունակեց նա։
Ցմահ դատապարտյալի խոսքով՝ տույժն ազդելու է պայմանական վաղաժամկետ ազատ արձակվելու վրա։
«Ա1+»-ի հարցմանն ի պատասխան՝ Քրեակատարողական վարչության հանրային կապերի բաժնի պետ Նոնա Նավիկյանը հայտնեց, որ Հունան Հունանյանը մարտի 25-ին է տեղափոխվել է «Էրեբունի» բժշկական կենտրոն, ենթարկվել ողնաշարի ՄՌՏ հետազոտության։
«Նպատակահարմար չեն գտել վիրաբուժական որևէ միջամտություն իրականանացնել։Հետազոտության բոլոր արդյունքների պատճենները տրամադրվել է Հունան Հունանյանին, ու բացատրվել է, որ նա վիրահատման ենթակա չէ։ Հունան Հունանյանն այս պահին գտնվում է «Արմավիր» ՔԿՀ-ի բժշկական անձնակամի հսկողության տակ, անհրաժեշտության դեպքում ստանում է դեղորքային բուժում»,- ասաց Նոնա Նավիկյանը։
Գլխավոր դատախազության հանրային կապերի բաժնից էլ տեղեկացրեցին, որ դատախազ Արայիկ Բրուտյանի կողմից որևէ ստիպողաբար գործողություն չի եղել։
«Նախ ինքը սկզբից ասել է, որ իր առողջության հետ կապված է ցանկանում հանդիպել, հետո երբ հանդիպել են, ընդհանրապես առողջության հետ կապված չի խոսել, այլ իր գործից է խոսել, բայց որևէ բան դատախազի կողմից, բացառվում է»,- հայտարարեց Գլխավոր դատախազության հանրային կապերի բաժնի պետ Արևիկ Խաչատրյանը։
Ինչո՞ւ Հունան Հունանյանը չի մասնակցել կնոջ հուղարկավորությանը
Հունան Հունանյանը նաեւ նշել էր, որ «Արմավիր» ՔԿՀ-ում չեն թույլատրել, որ նա գնա և մասնակցի կնոջ հուղարկավորության արարողությանը։
«Ա1+»-ի հետ զրույցում քրեակատարողական վարչության հանրային կապերի բաժնի պետ Նոնա Նավիկյանը նշեց, որ «Արմավիր» ՔԿՀ-ն կարճատև մեկնում տրամադրել է, բայց խնդիրն այն է, որ պետք է մահվան վկայական, անձնագիր ու զագսի թուղթ ներկայացվի քրեակատարողական հիմնարկ, բայց Հունան Հունանյանի կնոջ հարազատները չեն ցանկացել, որ նա մասնակցի կնոջ հուղարկավորությանը։
Նշենք, որ Հունան Հունանյանը դատապարտվել է 2002-ին։ Նա դատապարտվել է Քրեական օրենսգրքի մի շարք հոդվածներով՝ սպանություն, բռնաբարություն, ավազակություն, գողություն։
Նա չի ընդունում առաջադրված մեղադրանքը։