Լեհական կողմը շատ զարմացած էր, որ մենք փող չէինք ուզում իրենցից. Արման Աբովյան
Աջակցիր «Ա1+»-ինԱզգային ժողովի արտաքին հարաբերությունների մշտական հանձնաժողովի պատվիրակությունը հուլիսի 2-4-ը մեկնել է Վարշավա: Հանդիպումներ են եղել Լեհաստանի Հանրապետության Սենատի արտաքին հարաբերությունների եւ ԵՄ հարցերով հանձնաժողովի անդամների հետ:
«Իմ քայլը» խմբակցության պատգամավոր, պատվիրակության անդամ Սոս Ավետիսյանը լրագրողների հետ ճեպազրույցում նշեց, որ քննարկվել է վիզաների ազատականացման, Լեռնային Ղարաբաղի հակամարտության կարգավորման և երկու երկրների միջև հարաբերությունների վերաբերյալ հարցեր:
«Բարգավաճ Հայաստան» խմբակցության պատգամավոր Արման Աբովյանը նշեց, որ լեհական կողմը հետաքրքրված էր այն իրավիճակներով, որոնք հիմա տեղի են ունենում Հայաստանում:
«Նրանք ուզում էին հասկանալ, թե ինչ է փոփոխվել Հայաստանում, ոչ թե դեկլարատիվ, այլ իրականում՝ ինչ փոփոխություններ են նախատեսվում: Շատ էին հետաքրքրված հակակոռուպցիոն մարմնի, տարածաշրջանային և Լեռնային Ղարաբաղի հակամարտության կարգավորման վերաբերյալ հարցերով»,- ասաց նա:
Հայաստանի պատվիրակությունը հանդիպում է ունեցել նաև Լեհաստանի արտաքին գործերի նախարարության ներկայացուցիչների հետ: «Իմ քայլը» խմբակցության պատգամավոր Անուշ Բեղլոյանը տեղեկացրեց, որ լեհ գործընկերների հետ խոսել են նաև մտահոգող հարցերի վերաբերյալ:
«Լեհաստանի արտաքին գործերի նախարարը Բաքվում հայտարարություն էր արել, որում սատարել է Ադրբեջանի տարածքային ամբողջականությունը, չնշելով ազգերի ինքնորոշումը: Դա մեզ մտահոգվելու առիթ էր տվել և մենք անկեղծ քննարկում ունեցանք դրա վերաբերյալ: Կարող եմ ասել, որ դրա արդյունքը եղել է այն, որ Լեհաստանի արտաքին գործերի նախարարը մեզ հավաստիացրեց, որ այսուհետ Լեհաստանի արտաքին գործերի նախարարությունը կլինի ավելի ուշադիր և բալանսավորված իր հայտարարություններում»,- ընդգծեց Անուշ Բեղլոյանը:
Լեհաստանի ներկայացուցիչները զարմացել են, որ հայկական պատվիրակությունը փող չի ուզել իրենցից: Այս մասին ասաց ԲՀԿ-ական Արման Աբովյանը:
Ի լրումն նրա, «Լուսավոր Հայաստան» խմբակցության պատգամավոր Արման Բաբաջանյանը նկատեց, որ թեև հայկական կողմը փող չի ուզել, բայց նաև չի ասել, թե ինչ է ուզում:
«Արտաքին գործերի նախարարության պաշտոնյան ինձ հարցնում էր, որ իրենք մեկ տարի է փորձում են Հայաստանից հասկանալ այն առաջնահերթության մասին, որի շուրջ կարող են խոսակցություններ լինել Հայաստանի և Լեհաստանի միջև, և մինչև հիմա նրանց այդ առաջնահերթությունը պատկերավոր չի ներկայացվել»,- շեշտեց նա: