Լեհերը կարծես տեղյակ չէին, որ Հայաստանում հեղափոխություն է եղել. Արման Բաբաջանյան
Աջակցիր «Ա1+»-ին«Լուսավոր Հայաստան» խմբակցության պատգամավոր Արման Բաբաջանյանին չի գոհացրել Վարշավա այցելությունը: Ազգային ժողովի արտաքին հարաբերությունների մշտական հանձնաժողովի պատվիրակությունը հուլիսի 2-4-ը մեկնել է Վարշավա, որտեղ հանդիպել են Լեհաստանի Հանրապետության Սենատի արտաքին հարաբերությունների եւ ԵՄ հարցերով հանձնաժողովի ներկայացուցիչների հետ:
«Հիասթափված պիտի խոսեմ մեր վարած խորհրդարանական դիվանագիտության մասին, որովհետև կարծում եմ, որ Եվրամիությունը և դրա անդամ երկրների հետ աշխատանքը պատշաճ չի կատարվում խորհրդարանի մակարդակով, ինչպես նաև արտաքին քաղաքական գերատեսչության: Լեհաստանը այդ իմաստով փայլուն օրինակ է չկատարված աշխատանքի»,- լրագրողների հետ ճեպազրույցում նշեց նա:
Արման Բաբաջանյանը լեհ գործընկերների հետ հանդիպումներից տպավորություն է ստացել, որ լեհերը տեղյակ չէին, որ Հայաստանում իշխանություն է փոխվել:
«Անկեղծ ասաց մեր համատեղ նիստի որոշ դրվագներից տպավորություն ստացա, որ լեհերը տեղյակ չէին, որ Հայաստանում հեղափոխություն է եղել և իշխանություն է փոխվել: Նրանք շարունակում էին ի դեմս մեզ, տեսնել մարդկանց, որոնք ուղիղ կապ ունեն նախկին իշխանության հետ, ասենք՝ Ռուբեն Ռուբինյանի փոխարեն կարծես նստած էր Արմեն Աշոտյանը և հռետորաբանության և տեքստերի փոփոխություն չէի նշմարում: Թեև մեր տեքստերը ուղեկցվում էին այն փոփոխությունների համատեքստում, որոնք տեղի էին ունեցել 2018 թվականին»,- ընդգծեց Արման Բաբաջանյանը:
Ինչ վերաբերում է վիզաների ազատականացմանը, ապա պատգամավորն այս հարցում նույնպես լավատեսորեն չի տրամադրված: Նա նշեց, որ վիզաների ազատականացման հետ կապված՝ լեհերը Հայաստանին չեն պաշտպանելու:
«Շատ կոնկրետ հարցադրումներ ունեն մեր արտաքին քաղաքականության հանձնառությունների վերաբերյալ և այն սպասումները, որ մենք ունենք արագության մասով, դրանք ուղղակի տեղին չեն, պիտի սպասումները զուսպ լինեն»,- նկատեց նա:
