Ինչի՞ց է կախված ոստիկանության պաշտոնյա Գեղամ Պետրոսյանին մեղադրանք առաջադրելը (տեսանյութ)
Աջակցիր «Ա1+»-ին«Ինձ համար կարևոր է, որ նախաքննական մարմինը հետևողական իրականացնելով բացահայտումներ, ինքն էլ բարձրացնում է իր արժեքը և պրոֆեսիոնալ ունակությունները: Պարոն Սասուն Խաչատրյանին և մեզ շնորհավորում եմ»,- ասաց Պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը՝ անդրադառնալով Գեղամ Պետրոսյանի ձերբակալությանը։
Գեղամ Պետրոսյանին մեղադրանք ներկայացնելը կախված կլինի, թե նախաքննական մարմինը ինչ հաջորդականությամբ կներկայացնի գործի նյութերի էությունը, -ասում է Քոչարյանը:
«Կարծում եմ Գեղամ Պետրոսյանի ձերբակալությունը այսքան տարիներ հետո խոսում է այն մասին, որ ձեռք են բերվել շատ ավելի հիմնավոր ապացույցներ կատարված գործողություննեի վերաբերյալ: Այդ տրամաբանությամն մեջ համոզված եմ, որ կարող են շղթայական գնալ այլ բացահայտումների»,- «Ա1+»-ին ասաց Անդրանիկ Քոչարյանը:
Պաշտպանության և անվտանգության հարցերի մշտական հանձնաժողովի նախագահից հետաքրքրվեցինք նաև երեկ՝ հունիսի 4-ին մոտ 15 հոգի, այդ թվում դաշնակցականներ՝ ՀԱԿ ակտիվիստ Վարդան Հարությունյանին ծեծելն իրենց վերագրելու արարքից։ Անդրանիկ Քոչարյանն այստեղ իրավապահ մարմինների անելիքն է տեսնում:
«Փաստորեն, երբ որ հանրահավաքի ժամանակ դաշնակցությունը դեղին քարտ էր ցույց տալիս, ես հասկացա, որ խոսքը դեռ վերաբերում է մարդ ծեծելուն, Աստված չանի, երբ որ կարմիր քարտ ցույց տան, արդեն պետք է հպարտանա՞ն այլ գործողություններով: Իրավապահ մարմինները հստակ անելիք ունեն և մարդ ծեծելը պետք է հպարտության առարկա չլինի: Ծեծը քրեորեն հետապնդելի արարք է, և եթե դրանով փորձում են հերոսանալ, ապա հերոսանալու շատ այլ տարբերակներ կան: Խորհուրդ կտամ մեր քաղաքական գործիչներին կատարած քայլերի տրամաբանությունը ստորադասեին մեր երկրում գործող օրենքներին»:
