Այդ լուրը իմանալուց հետո էմոցիոնալ պահեր եմ ապրել. Նիկոլ Փաշինյանը՝ Գեղամ Պետրոսյանի ձերբակալման մասին

«Այդ լուրը իմանալուց հետո էմոցիոնալ պահեր եմ ապրել, բայց, քանի որ խոսքը դեռ ձերբակալության մասին է, չգիտենք մեղադրանք կառաջադրվի՞, թե՞ ոչ, բայց որ Մարտի 1-ի բոլոր սպանությունները պետք է բացահայտվեն և, որ 2008թ. քննությունը տարվել է կոծկելու ուղղությամբ, կարծում եմ՝ ակնհայտ է»- Ազգային ժողովում լրագրողների հետ զրույցում, այսպես արձագանքեց վարչապետ Նիկոլ Փաշինյանը՝ Մարտի 1-ի քրեական գործի շրջանակում ձերբակալված Գեղամ Պետրոսյանի մասին:

Հիշեցնենք, որ հունիսի 4-ին Հատուկ քննչական ծառայությունը հաղորդագրություն է տարածել, որում նշված է, որ սպանություն կատարելու կասկածանքով Մարտի 1-ի քրեական գործի շրջանակներում ձերբակալվել է ոստիկանության նախկին բարձրաստիճան պաշտոնյա: Հրազենի գործադրմամբ Զաքար Հովհաննիսյանին դիտավորությամբ կյանքից զրկելու կասկածանքով ձերբակալվել է 2008 թվականի մարտի 1-ի դրությամբ ՀՀ ոստիկանության զորքերի հրամանատարի տեղակալի, նույն ինքը` շտաբի պետի պաշտոնը զբաղեցրած Գեղամ Պետրոսյանը:

Անդրադառնալով Երևանի ընդհանուր իրավասության դատարանի կողմից  Մարտի 1-ի անջատված գործի կասեցմանը և   Սահմանադրական դատարան ուղարկելուն, Նիկոլ Փաշինյանը նկատեց, որ իրավական գնահատական տալ չի կարող, բայց արձանագրում է, որ ամեն ինչ ընթանում է բնականոն ընթացքով, բոլորի իրավունքները պաշտպանված են: