«Ի՞նչ կպատահեր, եթե Հենրիխ Մխիթարյանը Բաքվում դառնար գոլի հեղինակ և բարձրացներ հայկական դրոշը»
Աջակցիր «Ա1+»-ինԱզգային ժողովի Գիտության, կրթության, մշակույթի, սփյուռքի, երիտասարդության և սպորտի հարցերի հանձնաժողովի նախագահ Մխիթար Հայրապետյանը՝ այսօր լրագրողների հետ զրույցում անդրադարձավ անգլիական «Արսենալի» կիսապաշտպան Հենրիխ Մխիթարյանի՝ Բաքու չմեկնելուն:
«Մեր հավաքականի ավագը՝ Մխիթարյանը, հստակ գիտակցում է, որ Ադրբեջանը զինադադարից հետո սկսած, հստակ կրթական քաղաքականություն է իրականացնում հասարակության շրջանում՝ հայատյացություն տարածելու ուղղությամբ: Հետևաբար` մեկնելով Բաքու, մեր ֆուտբոլիստը գիտակցում է, որ լինելու է այնպիսի մթնոլորտ, որտեղ ընդգծված հակահայկականություն է լինելու: Իմ ունեցած տեղեկություններով, որոշ նախապայմաններ են դրել մեր ֆուտբոլիստի առաջ, որոնց մասին հույս ունեմ ինքը կխոսի բարձրաձայն»,-պարզաբանեց Մխիթար Հայրապետյանը:
Մխիթար Հայրապետյանը՝ Հենրիխ Մխիթարյանի Բաքու չմեկնելու որոշումը սատարում է:
« Դա կշռադատված որոշում էր, որովհետև խոսքը միայն անվտանգության երաշխիքների մասին չէ: Ինչպես կարելի է երաշխիք տալ, թե ինչ կպատահեր, եթե Հենրիխ Մխիթարյանը Բաքվում դառնար գոլի հեղինակ և բարձրացներ հայկական դրոշը»,- ընդգծեց Մխիթար Հայրապետյանը: