Խորհուրդ կտամ պարոն Իոաննիսյանը հանգիստ նստի տեղը. Արթուր Վանեցյան (տեսանյութ)
Աջակցիր «Ա1+»-ին«Ինչ-որ մի տեղից պատվեր ստանալուց հետո Դանիել Իոաննիսյանը սկսեց սուտ լուրեր տարածել, որոնք հիմք չունեն»,- Ազգային ժողովում լրագրողների հետ զրույցում հայտարարեց Ազգային անվտանգության ծառայության տնօրեն Արթուր Վանեցյանը՝ անդրադառնալով «Իրազեկ քաղաքացիների միավորում» հասարակական կազմակերպության ծրագրերի համակարգող Դանիել Իոաննիսյանի հայտարարությանը, թե Վանեցյանը մտերիմ է որոշ քրեական հեղինակությունների հետ: Մասնավորապես՝ Վստրեչի Ապերի, Թոխմախի Բաբոյի, Վովայի Արշակի հետ:
«Ես ճանաչում եմ Բաբկեն Ղազարյանին (Թոխմախի Բաբո), որը ՊԵԿ-ի մաքսային ծառայության գնդապետն է, աշխատել է Էրեբունի վարչական շրջանի ղեկավարի տեղակալ և ես աշխատել եմ Էրեբունի վարչական շրջանում որպես ազգային անվտագության բաժնի պետ, և ի պաշտոնե՝ ես շփվել եմ նրա հետ և այո, նորմալ հարաբերություններ ունեմ այդ անձի հետ: Արշակ Հակոբյանին (Վովայի Արշակ) ծանոթ եմ դեռևս 1996 թվականից, երբ ես ծառայում էի բանակում, իսկ ինքը աշխատում էր ռազմական ոստիկանությունում: Արշակ Հակոբյանի հետ երբևէ մտերիմ հարաբերություններ չեմ ունեցել: Արամ Վարդանյանի (Վստրեչի ապեր) հետ շփվել եմ մեկ կամ երկու անգամ գործնական, ինքը կատարել է իրավախախտում և ես իրեն բերման եմ ենթարկել ԱԱԾ քննչական վարչություն՝ հարցաքննության նպատակով: Այլ շփումներ այդ մարդկանց հետ չունեմ: Խորհուրդ կտամ պարոն Իոաննիսյանը հանգիստ նստի տեղը»,- պարզաբանեց ԱԱԾ-ը տնօրենը:
Վանեցյանը անդրադարձավ նաև վերջին օրերին անընդհատ քննարկվող վեթթինգի մասին: Հարցին, թե միայն դատական համակարգում պետք է իրականացվի՞ այն, թե՞ այլ մարմիններում էլ, նա պատասխանեց.
«Ես անհրաժեշտություն եմ տեսնում առհասարակ՝ ողջ պետական համակարգում, որպեսզի հասարակության շրջանում չմնան կասկածներ որևէ պաշտոնյայի կապերի, գործերի օրինականության և ունեցվածքի մասին»:
Տեսանյութերը՝ Ազատություն ռադիոկայանի