Թատերական ինստիտուտում ռեկտորի ընտրություն է
Աջակցիր «Ա1+»-ինԵրևանի թատրոնի և կինոյի պետական ինստիտուտում այսօր կայացել է ռեկտորի ընտրություն, որի միակ թեկնածուն ռեկտորի ժամանակավոր պաշտոնակատար Լիլիթ Արզումանյանն է։ Ընտրությունը դեռ չի ավարտվել, պարզ չէ, թե երբ հայտնի կլինի արդյունքը։ Այս մասին «Ա1+»-ի հետ զրույցում ասաց Լիլիթ Արզումանյանի գործավարուհին՝ Սուսաննա Ղազարյանը։
Հիշեցնենք, որ երեկ՝ մայիսի 21-ին, Լիլիթ Արզումանյանի նախաձեռնությամբ ուսանողների հետ հանդիպում էր կազմակերպվել, որի ժամանակ քննարկվում էր, թե ինչո՞ւ է ռեկտորի թեկնածուն միայն մեկը։ Հանդիպմանը Լիլիթ Արզումանյանը նշել էր, որ ինքը ինքնաբացարկ կհայտնի, իսկ ուսանողներին խորհուրդ տվել, որ դիմեն նամակով Կրթության և գիտության նախարարին և իրենց պահանջները ներկայացնեն։
Ի դեպ, ռեկտորի թեկնածության հայտ էին ներկայացրել նաև ԵԹԿՊՀ-ի ստեղծագործական և հեռանկարային զարգացման գծով տեղակալ Արմեն Հարությունյանը և թատերագետ Վասիլի Գևորգյանը: Բայց նրանք չունեին ռեկտոր ընտրվելու համար պահանջվող ՀՀ ժողովրդական արտիստի, ՀՀ վաստակավոր արտիստի, ՀՀ արվեստի վաստակավոր գործչի, ՀՀ մշակույթի վաստակավոր գործչի կոչումներից որևէ մեկը։
