Երեք քաշային կարգի ըմբիշների ելույթներից դժգոհ եմ. Լևոն Ջուլֆալակյան (տեսանյութ)

Հայաստանի հունահռոմեական ըմբշամարտի հավաքականի գլխավոր մարզիչ Լեւոն Ջուլֆալակյանը կարծում է, որ Եվրոպայի առաջնությունում ավելի շատ եւ որակյալ մեդալներ կնվաճեին մեր ըմբիշները, եթե չլինեին խանգարող պատճառներ:

«Կարեն Ասլանյան ու Արսեն Ջուլֆալակյանը, որոնք բրոնզե մեդալներ նվաճեցին,  կարող էին եզրափակիչ մտնել, եթե նրանց գոտեմարտերում չլինեին մրցավարական բացթողումներ: Երեք քաշային կարգերում մեր ըմբիշները նույնպես 3-րդ տեղերին էին հավակնում, սակայն նրանք պարտվեցին հիմնականում տակտիկական բացթողումների պատճառով: Չորս քաշային կարգերի մասնակցությունից դժգոհ եմ: 130կգ քաշում հանդես եկած Դավիթ Հովասափյանը դեռ երիտասարդ է եւ մեծ ակնկալիքներ չունեինք, բայց ահա Ռուդիկ Մկրտչյանից (55կգ), Գեւորգ Ղարիբյանից (60 կգ) եւ Սարգիս Քոչարյանից (82 կգ) մեր սպասելիքներն ավելի շատ էին: շատ վատ հանդես եկան: Իրենք պետք է մտածեն, թե ինչու այդպես վատ գոտեմարտ անցկացրին», - այսօր կազմակերպված մամուլի ասուլիսին ասաց փորձառու մասնագետը:

Հայաստանի հունահռոեմական հավաքականը Եվրոպայի առաջնությունում բացի երկու բրոնզե մեդալներից նվաճել է նաեւ եվրոպական խաղերի 5 ուղեգրեր: Լեւոն Ջուլֆալակյանը նշեց, որ Արթուր Ալեքսանյանի 99 տոկոսով կմասնակցի այդ խաղերին, սակայն ամենակարեւորը լինելու է սեպտեմբերին Ղազախստանում կայանալիք աշխարհի առաջնությունը, որտեղ վեց քաշային կարգերում վիճարկելու են արդեն 2020թ օլիմպիական խաղերի ուղեգրեր: