Այսօր կխաղարկվի Հայաստանի բասկետբոլի անդրանիկ գավաթը
Այսօր տեղի կունենա տղամարդկանց բասկետբոլի Հայաստանի գավաթի անդրանիկ խաղարկության եզրափակիչ հանդիպումը: Մրցանակի համար կպայքարեն Երեւանի «Ուրարտու Վիվառոն» և Ստեփանակերտի «Արցախը»: Խաղը կկայանա նախկին «Միկա» մարզադահլիճում, ժամը 20:00-ին: Հիշեցնենք, որ խաղարկության կիսաեզրափակիչ փուլում «Ուրարտու Վիվառոն» երկու խաղերի արդյունքներով վստահ հաղթել էր «Արագածին», իսկ «Արցախը» պայքարից դուրս էր բերել «Էրեբունի Սեդարսին»: Թիմերը վերջին անգամ հանդիպել են ապրիլի 1-ին: Այդ օրը Ա լիգայի 1/2 եզրափակիչ փուլի վերջին խաղում «Ուրարտու Վիվառոն» հյուրընկալվելիս 85:80 հաշվով առավելության էր հասել «Արցախի» նկատմամբ, սերիայի հաշիվը դարձրել էր 4:3 եւ դուրս եկել եզրափակիչ, որտեղ մրցելու է «Արագած» թիմի հետ: Ի դեպ, գավաթի խաղարկության կանոնակարգով թիմերը հանդիպման ժամանակ դաշտում անպայման 3 հայ խաղացողներ պետք է ունենան, ինչը չի կիրառվում Ա լիգայի հանդիպումների ժամանակ:
