Զորեղ մրցակիցների հետ խաղալու համար դա քիչ է. գլխավոր մարզիչ
Միջազգային խաղերում տեմպին եւ ռիթմին ընտելանալու խնդիրներ են առաջանում,-ասում է Հայաստանի ֆուտբոլի Մ-19 հավաքականի գլխավոր մարզիչ Արթուր Ոսկանյանը եվրոպական առաջնությունից առաջ։ Ըստ նրա՝ խաղից խաղ թիմը զարգանում է. «Հավաքականը խաղային ձեռագիր է ձեւավորել: Գրոհների կազմակերպման հարցում առաջընթաց ունենք: Թե՛ դիրքային, թե՛ արագ գրոհների ժամանակ թիմը հավատարիմ է մնում յուրացված խաղաոճին: Բայց զորեղ մրցակիցների հետ խաղալու համար սա քիչ է, պետք է անընդհատ զարգացնենք թիմային պաշտպանությունը»: ՀՖՖ մամուլի ծառայության փոխանցմամբ՝ Արթուր Ոսկանյանն ասել է, որ մրցաշարի ֆավորիտ կլինի այն թիմը, որը սկզբից մինչեւ վերջ կպահպանի խաղային կարգապահությունը եւ թիմային խաղի մոտեցումները, կունենա հաղթելու ամենամեծ ցանկությունը. « Բոլոր թիմերն էլ լավ ֆուտբոլիստներ ունեն եւ իրար արժանի մրցակիցներ են»: Հիշեցնենք, որ Եվրոպայի մինչև 19 տարեկանների առաջնության եզրափակիչ մրցաշարին մասնակցելու իրավունք ունեն Հայաստանի, Իռլանդիայի, Չեխիայի, Նորվեգիայի, Իսպանիայի, Ֆրանսիայի, Պորտուգալիայի եւ Իտալիայի այդ տարիքային հավաքականները:
