Բացել լրահոսը Փակել լրահոսը
A A

Սերգեյ Սոլովյով. «Ես հիացած եմ Հայաստանով»

Մշակույթ

«Ես նույնիսկ չեմ կարող ասել, թե ֆիլմն ինչի մասին է. նա այն մասին է, թե մեզ հետ ինչ կատարվեց 1987թ. սկսած, երբ ցուցադրվեց «ԱՍՍԱ-1»-ը»,- «Ա1+»-ի հետ զրույցի ժամանակ, խոսելով «2-ԱՍՍԱ-2» ֆիլմի երեւանյան ցուցադրման մասին, նշեց ռուս հայտնի ռեժիսոր, պրոդյուսեր Սերգեյ Սոլովյովը:

«2-ԱՍՍԱ-2» ֆիլմը 1987թ. ցուցադրված «ԱՍՍԱ-1»-ի շարունակությունն է, սակայն վերջին 20 տարում կատարված փոփոխություններով: «Ես չեմ կարող ասել, որ այն, ինչ մեզ հետ տեղի ունեցավ, շատ գեղեցիկ ու լավ էր, հրաշալի էր: Ես չեմ կարող ասել նաեւ, որ այդ ամենը սարսափելի ու ահավոր էր: Իհարկե, իրականության պատկերը տխուր է, բայց դրա մասին բոլորս էլ գիտենք ու համակերպվել ենք»,- ասում է մեծանուն ռեժիսորը:

Նա իր ֆիլմը նկարագրում է այսպես` ֆիլմ ֆիլմի մասին, որտեղ հերոսները, մասնակցելով «Աննա Կարենինա» ֆիլմի նկարահանումներին, զուգահեռների միջոցով բացահայտում են ժամանակի ոգին ու բացում մարդկային հոգեբանության խորը առանձնահատկությունները: Ֆիլմի հերոսուհին հանցագործ է, որին, սակայն, հնարավորություն է ընձեռնվում նկարահանվել Աննա Կարենինայի դերում: Խաղալ Աննայի դերը, հերոսուհու համար առանձնահատուկ նշանակություն ուներ, քանի որ բանտում անցկացրած օրերին Տոլստոյի այս հերոսուհին եղել է իր հոգեվիճակին մոտ ու հարազատ: Ի դեպ, Աննայի դերը կատարում է Տատյանա Դրուբիչը` Սերգեյ Սոլովյովի կինը:

Ֆիլմի երեւանյան ցուցադրմանը «Մոսկվա» կինոթատրոնի դահլիճը լեփ-լեցուն էր: Ինչպես նշեց Սերգեյ Սոլովյովը` ֆիլմի համաշխարհային պրեմիերան ցուցադրվել է Սանկտ Պետերբուրգում` իր հարազատ Միխայլովյան թատրոնում: Սակայն երեւանյան ցուցադրումը առաջիններից մեկն է: «Ինձ համար շատ հաճելի է Երեւանում իմ ֆիլմերի առաջին ցուցադրումներն անել: Այստեղ էլ եմ ունեցել իմ այլ ֆիլմերի առաջին ցուցադրումներ: Օրինակ` 8 տարի առաջ «Քնքուշ տարիք» ֆիլմիս առաջին ցուցադրումը եւս այստեղ`«Մոսկվա» կինոթատրոնում եղավ»,- նշեց նա:

Ինչ վերաբերում է հայ կինոգործիչների հետ համագործակցությանը, ապա նրա ասելով` դեռ ոչ մի ռեալ ծրագիր կազմած չունի. «Համատեղ կինոարտադրություն դեռեւս չգիտեմ`կլինի, թե ոչ, քանի որ դեռեւս ռեալ խոսակցություններ այդ մասին չեն եղել»: Սակայն Հայաստանի հետ կապված, Սոլովյովի վստահեցմամբ` ծրագրեր ունի. «Ես ցանկանում եմ իմ մտերիմ ընկեր Ռոման Բալայանի հետ այսօր, վաղը եւս մեկ անգամ ման գալ Հայաստանով: Սա է իմ ամենագլխավոր պլանը»:

Իսկ հայ կինոարվեստի գործիչներին նա ցանկանում է, որպեսզի «այն մարդկանց սերը, որոնք սիրում են կինո ստեղծել, շարունակի արթուն մնալ»: «Ամենագլխավորը նաեւ այն է, որ հանդիսատեսի սերը կինոյի նկատմամբ Հայաստանում եւս շարունակի արթուն մնալ եւ բազմապատկվել»,- ավելացրեց մեծանուն ռեժիսորը: