Սիգը բացահայտ և անարգել վաճառվում է ամենուրեք. Բարդուղ Գաբրիելյան (տեսանյութ)
Սիգի պաշարները այս տարի աճել են: Հոկտեմբեր ամսին գրանցվել է 30-33 % աճ: «Այս տարի սիգի պաշարները գնահատվել են 740 տոննա, անցյալ տարի՝ 540 տոննա»,- նշեց Գիտությունների ազգային ակադեմիայի կենդանաբանության և հիդրոէկոլոգիայի կենտրոնի տնօրեն Բարդուղ Գաբրիելյանը: Ի տարբերություն սիգի, մյուս ձկնատեսակների պաշարները ընկել են: Օրինակ՝ իշխանի պաշարը անցյալ տարի կազմել է 17 տոննա, այսօր գնահավում է 1-2 տոննա: Ըստ Գաբրիելյանի՝ կարասի պաշարները կազմել են մոտ 30-40 տոննա: Կարասի պարագայում թույլատրվում է անսահմանափակ որս, որովհետև այն Սևանի համար ոչ ցանկալի ձկնատեսակ է: Խեցգետնի պաշարները գնահատվել են 2300 տոննա, անցյալ տարի 2600, իսկ նախանցած տարի՝ 4500 տոննա: Բարդուղ Գաբրիելյանը անդրադարձավ նաև սիգ ձկնատեսակի որսագողությանը: «Ներկայումս սիգի համար ձվադրման շրջան է համարվում, սակայն բացահայտ և անարգել վաճառվում է ամենուրեք: Խոսքը ոչ միայն ձկան մասին է, այլև ձկնկիթի»: Սրա առնչությամբ որևէ պատկան մարմին չի մտահոգվում, ինչը զարմացնում է Գաբրիելյանին: Ըստ նրա՝ արդյունագործական պաշարը պետք է 1000 տոննայից ավել լինի, որ թույլատրվի ինչ-ոչ տոկոս որսալ: Թեև սիգը ներմուծված ձկնատեսակ է, բայց և էկոլոգիական մեծ նշանակություն ունի:
