«Սասնա Ծռերի» ավտոերթը դեպի Արցախ` ցուցադրական ցինիզմ է. Վոլոդյա Հովհաննիսյան
Քաղաքագետ Վոլոդյա Հովհաննիսյանի համոզմամբ՝ Սասնա ծռերը զենք են բարձրացրել ոչ միայն հայ սպայի վրա, այլև հայկական պետականությունն են փորձել ոչնչացնել: «Խոնարհվում եմ Արայիկի, Պավլիկի և Սեֆիլյանի առաջ, բայց ոչ ոք իրավունք չունի հայոց պետության դեմ զենք վերցնել»: Նրա կարծիքով՝ նոյեմբերի 17-ին «Սասնա Ծռերի» ավտոերթը դեպի Արցախ` մասնակցելու Արցախում ստեղծվելիք «Սասնա Ծռեր» արցախյան կուսակցության հիմնադիր համագումարին, հարվածում է Արցախի պետականությանը: «Նման քայլերը ցուցադրական, հակապետական քայլեր են, ավելի շատ ցուցադրական, քաղաքական ցինիզմ է»: Ըստ «Ընդդեմ իրավական կամայականության» ՀԿ նախագահ Լարիսա Ալավերդյանի՝ ցանկացած մուտք Արցախ, պետքէ տեղի ունենա Արցախի իշխանությունների հետ բանակցելուց հետո: «Քանի դեռ Սեֆիլյանը ՀՀ քաղաքացի չէ, նա իրավունք չունի Արցախում կազմակերպել քաղաքական որևէ գործողություն»: Լարիսա Ալավերդյանը անդրադարձավ նաև Հ2 հեռուստաընկերության տնօրեն Սամվել Մայրապետյանի ձերբակալմանը. «Ուժեղ հիմք չկա, որով Մայրապետյանը ստիպված է կալանավորված մնալ»: Հայաստանի նոր իշխանությանը կարելի է պիտակավորել ընտրովի արդարադատության համար: «Մայրապետյանի առնչությամբ գործը բերում է այն համոզմունքին, որ Հայասատնում դեռ գոյություն ունի ընտրովի արդարարադատություն»:
