Live. Արայիկ Հարությունյանի մամուլի ասուլիսը՝ իր հրաժարականի մասին (տեսանյութ)
Արցախի Հանրապետության պետական նախարար Արայիկ Հարությունյանն աշխատանքից ազատվելու մասին դիմում է ներկայացրել ԱՀ նախագահ Բակո Սահակյանին: «Պետք է կադրային փոփոխություն, որը պլանավորել է երկրի նախագահը, եւ մենք դիմում ներկայացնելով օգնում ենք նախագահին իրականացնել այն ծրագրերը, որոնց շուրջ կան պայմանավորվածություններ»: Նա պնդում է, որ պատճառը նախորդ շաբաթ Արցախում տեղի ունեցող բողոքի ակցիաները չէին, երբ ԱԱԾ աշխատակիցների մասնակցությամբ միջադեպից հետո քաղաքացիները պահանջում էին ուժային կառույցների հրաժարականը։ Արցախում վերջին դժգոհությունները Արայիկ Հարությունյանը համարում է հետեւանք Հայաստանում կատարվածի, որը նման փոփոխությունների օրակարգ է բերել նաեւ Արցախ։ «Ղարաբաղ-Տելեկոմի սակագինը տարիներ առաջ շատ ավելի բարձ էր քան հիմա, բայց ակնհայտ բողոքներ չեն եղել: Հանրությունը նոր օրակարգ է դնում եւ դրանից ելնելով՝ ես նպատակահարմար եմ գտնում իմ ծառայությունը մատուցել կուսակցության առաջնորդի դերում»: Արայիկ Հարությունյանը պնդում է՝ Պետնախարարի պաշտոնը թույլ չի տալիս իրականացնել այն, ինչ ուզում է: «Պետնախարար լինելը սահմանափակում է իմ հնարավորությունները: Ես ուզում եմ լինել ավելի ազատ քաղաքական գործիչ եւ մասնակցել այս բարեփոխումներին: Լինելով պետական պաշտոնյա, դու սահմանափակ ես քո ազատ միտքը արտահայտելու»: Ազատ Հայրենիք կուսակցության նախագահը չի պատրաստվում քաղաքականությունից հեռանալ: «Չի կարող քաղաքական ամենախոշոր ուժը խուսափի պատասխանատվությունից, շարունակելու եմ ղեկավարել կուսակցությունը, մասնակցելու եմ նախագահի կողմից իրականացվող բարեփոխումներին»: Այսօր հրաժարական դիմում են ներկայացրել նաեւ Արցախի Ազգային անվտանգության ծառայության տնօրեն Արշավիր Ղարամյանը և ոստիկանության պետ Կամո Աղաջանյանը: «Միայն իմ պաշտոնաթողությունը չի լինի, դուք առաջիկա օրերին կտեսնենք կադրային այլ փոփոխություններ»: Ի դեպ, Արայիկ Հարությունյանը կարծում է, որ պաշտոնյան չպետք է կառչած մնա աթոռից։ «Պետք է տեսնեն, որ պաշտոնյան կարող է հրաժարական տա եւ ազատ քայլի փողոցով: Ունեմ երկու տարեկանը չլրացած աղջիկ, ուղիղ վեց օր արթուն չեմ տեսել, բայց իմ ամենամեծ հաճույքը գրկելն է նրան ու համբուրելը, ես էլ եմ ուզում մի քիչ իմ ընտանիքի հետ շփվել»:
