«Փաշինյանի հետ պայմաններով չես կարող խոսել» Գ Ծառուկյան (տեսանյութ)
Վարչապետի թեկնածու Նիկոլ Փաշինյանի հետ մինչ այսօր Ծառուկյան դաշինքը նախապայմանով չի խոսել. «Պայմաններ պարոն Փաշինյանի առաջ չենք դրել: Նիկոլ Փաշինյանն այն մարդն է, ում հետ պայմաններով կամ նախապայմաններով չես կարող խոսել»,- այսօր լրագրողներին ասաց ԲՀԿ առաջնորդ, Ծառուկյան դաշինքի պատգամավոր Գագիկ Ծառուկյանը: Նա անդրադարձավ նաեւ արտահերթ ընտրություններից հետո կոալիցիա կազմելուն «Ցանկացած պահով կազմենք, թե չկազմենք, իմացեք, որ Նիկոլ Փաշինյանի կողքին ենք լինելու»,- ավելացրեց ԲՀԿ առաջնորդը: Հարցին՝ արդյոք ներե՞լ է Նիկոլ Փաշինյանին, երբ վերջինս իր հասցեին միշտ քննադատություն էր հնչեցնում. «Մեր մեջ այդպիսի բան էլ չի եղել: Եթե ես հանրապետականին եմ ներել (ծիծաղում է): Ուժեղ մարդիկ միշտ ներող են լինում, փոքրոգի մարդիկ չեն ներում»: Գագիկ Ծառուկյանն այսօր անդրադարձավ նաեւ իր միջոցով Հովիկ Աբրահամյանի եւ Ռոբերտ Քոչարյանի վերադարձի մասին խոսակցություններին: «Ովքեր ասում են՝ իրենց գլխից հիմարություններ են դուրս տալիս: Բացառված է՝ Հովիկ Աբրահամյանը , Ռոբերտ Քոչարյանը Բարգավաճի հետ կապ ունենան: Նրանք կարող են առանձին կուսակցություններ բացել, մասնակցել»,- ասաց «Բարգավաճ Հայաստան» կուսակցության առաջնորդը: Նա տեղեկացրեց, որ Հովիկ Աբրահամյանի հետ մեկ, իսկ Ռոբերտ Քոչարյանի հետ երկու տարի է չի հանդիպել:
