Պատգամավորները ստիպված կլինեն շարժվել ժողովրդի թելադրանքով. քաղաքագետ (տեսանյութ)
Ընդամենը 6 օր Սերժ Սարգսյանը պաշտոնավարեց որպես Հայաստանի Հանրապետության վարչապետ՝ ընդլայնված լիազորություններով։ Հանրային ճնշումը նրան ստիպեց հրաժարական տալ։ «Մեծանում էր ճնշումը: Օրեցօր ավելանում էր տարատեսակ մարդկանց շերտեր, որոնք միանում էին շարժմանը, փաստացի շարժումը վարակել էր բոլորին: Ամբողջ հանրապետությունը մերժում էր Սերժին, եւ նման պարագայում դիմադրել շատ բարդ էր»,- ասում է քաղաքագետ Էդգար Վարդանյանը: Նրա խոսքերով՝ երեւանյան պայքարի 11 օրերի ընթացքում պարզ դարձավ, որ Սերժ Սարգսյանը չունի որեւէ հենարան. «Ինքը նույնիսկ չուներ վստահություն իր կուսակցության ներսում, աջակցություն: Մյուս կողմից էլ միջազգայհին հանրությունը սկսեց բավականին կոշտ դիրքորոշում ցուցաբերել՝ տեսնելով, որ կա այսպիսի հզոր բողոք»: Նրա խոսքերով՝ հանրապետական կուսակցությունը դե ֆակտո կազմալուծված է. «Որեւէ խնդիր չի լինելու: Նրանք, ովքեր կան խորհրդարանում, նրանք արդեն իսկ շարժվելու են ժողովրդի թելադրանքով, թավշյա հեղափոխության կամքին համապատասխան նրանք պետք է շարժվեն»: Նիկոլ Փաշինյանը անընդհատ շեշտում է, որ ժամանակավոր վարչապետը պետք է լինի ժողովրդի թեկնածուն։ Էդգար Վարդանյանի կարծիքով՝ ժողովուրդը ընդունում է Նիկոլ Փաշինյանին, եւ այդ ճնշում կլինի ԱԺ-ին։ Ըստ Սահմանադրության՝ կառավարության հրաժարականն ընդունվելուց հետո` յոթնօրյա ժամկետում, Ազգային ժողովի խմբակցություններն իրավունք ունեն առաջադրելու վարչապետի թեկնածուներ: Ազգային ժողովը վարչապետին ընտրում է պատգամավորների ընդհանուր թվի ձայների մեծամասնությամբ:Վարչապետ չընտրվելու դեպքում քվեարկությունից յոթ օր հետո անցկացվում է վարչապետի նոր ընտրություն: Եթե պատգամավորների ընդհանուր թվի ձայների մեծամասնությամբ վարչապետ չի ընտրվում, ապա անցկացվում է նոր ընտրություն:
