Ցուցարարները մաքրում են հրապարակը (տեսանյութ)
Հանրապետության հրապարակում այսօր խորհրդանշական մաքրություն էր: Երեկվա բազմահազարանոց ակցիայից հետո քաղաքը մաքրում են ոչ թե հատուկ աշխատակիցները, այլ ցույցի մասնակից քաղաքացիները. «Ինձ թվում է մեր բոլորի պարտքն էր այս ամեն ինչից հետո գալ եւ հավաքել մեր ետևից, հավաքել մեր երկիրը, մեր քաղաքը եւ մաքրելուց սկսել ամեն ինչ»,- ասում է Էլենը: Մեկ այլ քաղաքացի էլ ավելացնում է՝ «Նոր երկիրը ստեղծենք մաքուր հողի վրա»: Հավաքվածները ոչ միայն ծխախոտի մնացորդներն էին մաքրում, այլ այն ամենը ինչ տեսնում էին, անգամ հանել էին աղբամանները՝ մաքրելով նրանց շուրջը. «Մեր երկրի մաքրությունը ամենակարեւորն է ու առաջնային: Երբ շրջապատը մաքուր է, տրամադրությունը միշտ բարձր է: Նոր Հայաստան, Մաքուր Հայաստան»,- ասում են քաղաքացիները։ Այսօրվա մաքրման ակցիային ոչ միայն մեծահասակները եւ երիտասարդներն էին մասնակցում, այլ նաեւ փոքրիկները: «Պատմությունը կրկնվում է, 88 թվականին մայրիկին ինձ հետ տանում էի Օպերայի բակը մաքրելու»,- ավելացրեց քաղաքացիներից մեկը: Այսօրվա հավաքվածները որոշել են քաղաքը մաքրելուց եւ խնամելուց սկսել նոր Հայաստանի կառուցումը:
