«Իշխանությունը պետք է սիրի ժողովրդին, ժողովուրդը՝ իշխանությանը» (տեսանյութ)
Երկրում փոփոխություններ են կատարվում, սակայն ղեկավարությունը մնում է նույնը: Գրականագետ Դավիթ Գասպարյանը իշխանություններին կոչ է անում երկրում տնտեսություն ձեւավորել, կանխել արտագաղթը եւ դեմքով շուռ գալ դեպի ժողովուրդը, քանի որ այս վիճակում ապրելը վայել չէ մեր ժողովրդին: «Մենք երկու բեւեռների մեջ ենք: Մի կողմում ժպիտ է, հարստություն է, ունեւորությունն է ծաղկում, իսկ զգալի մասում մեծ անկում է, հուսահատություն, դժվարություն, հազար ու մի բաներ»,- ասում է գրականագետը: Քանդակագործ Ֆերդինանդ Առաքելյանն էլ մեր երկրում ամենամեծ խնդիրը համարում է այն, որ իշխանությունը պետք է սիրի ժողովրդին, իսկ ժողովուրդը՝ իշխանությանը. «Իսկ դա անելու համար արդեն ավելի լավ պետք է աշխատեն, քան երբեւիցե: Ժողովուրդը սպասում է դրան: Խոսում ենք արտագաղթից, ինչից է դա ՝ աշխատանք չունենալուց: Հույս ունենանք, որ լավ կլինի, որովհետեւ սրանից վատ էլ չի կարող լինել»: Բանախոսները վստահ են՝ միայն աշխատանքով կարելի է ժողովրդի մոտ վստահություն ձեւավորել:
